لاہور(این این آئی)سستی بجلی پیدا کرنے والے 8بجلی گھر فنی خرابی اور ایندھن کی عدم دستیابی کے باعث بند ہو گئے، سرکاری تھرمل پاور پلانٹس کے مسائل کی وجہ سے 5 ہزار 406میگاواٹ بجلی سسٹم سے نکل گئی۔
ذرائع کے مطابق بند پاور پلانٹس کا شمار سستی بجلی پیدا کرنے والے بجلی گھروں میں ہوتا ہے، 547میگاواٹ اوچ پاور پلانٹ فنی خرابی کے باعث بند ہے، اوچ پاور پلانٹ بجلی گھر 2روپے 55پیسے فی یونٹ میں بجلی پیدا کرتا ہے۔1230میگاواٹ تھرکول بجلی گھر بھی فنی خرابی کے باعث بند ہے، تھرکول پاور پلانٹ سے بجلی کی پیداواری لاگت 4روپے 28پیسے فی یونٹ ہے، 747میگاواٹ گدو بجلی گھر جنریٹر کی خرابی کے باعث بجلی پیدا نہیں کر رہا۔
ذرائع کے مطابق گدو پاور پلانٹ سے بجلی کی پیداواری لاگت 8روپے37پیسے فی یونٹ ہے، 920میگاواٹ ٹی پی ایس گدو پاور پلانٹ گیس کی عدم دستیابی کے باعث بند ہے۔395میگاواٹ روش، 151میگاوٹ ایف کے پی سی ایل بجلی گھر، ایل این جی کی عدم دستیابی کے باعث بند ہیں، ٹی پی ایس 839میگاواٹ مظفر گڑھ بھی ایندھن کی عدم دستیابی کے باعث بند ہے۔
