گوجرانوالہ (این این آئی)یونان کشتی حادثے میں گوجرانوالہ کا نوجوان معجزانہ طور پر محفوظ رہا جس نے ہوشربا انکشافات کئے ہیں۔تفصیلات کے مطابق یونان کشتی حادثے میں گوجرانوالہ کا ایک اور نوجوان انضمام معجزانہ طور پر محفوظ رہا، جب کہ اس کے اہل خانہ اس کی غائبانہ نماز جنازہ بھی پڑھ چکے تھے۔
گوجوانوالہ کے علاقے کوٹلی نواب سے تعلق رکھنے والا انضمام بھی لیبیا سے اٹلی جانے والی کشتی میں سوار تھا، اور حادثے میں بچ جانے کے بعد یونان کے ہسپتال میں زیر علاج رہا۔انضمام نے ویڈیو پیغام میں بتایا کہ انسانی سمگلر معصوم اور غریب شہریوں کو سبز باغ دکھاتے ہیں، لیکن جب سفر شروع ہوتا ہے تو انہیں کھانا ملتا ہے نہ پانی، بلکہ روزی کی تلاش میں نکلے افراد کو گٹر کا پانی پلایا جاتا ہے۔
انضمام نے درخواست کی کہ لوگ لیبیا سے یورپ ممالک کا غیر قانونی سفر نہ کریں، یہ راستہ موت کا راستہ ہے، میں نے اپنی آنکھوں کے سامنے لوگوں کو ڈوبتے دیکھا، سینکڑوں پاکستانی کشتی میں سوار تھے اور صرف 12پاکستانی اس حادثے میں زندہ بچ سکے ہیں، اللہ کا احسان ہے جس میں مجھے بھی دوسری زندگی عطا کی۔
