لاہور/حافظ آباد(این این آئی)بزرگ سیاستدان سابق وفاقی پارلیمانی سیکرٹری چوہدری افضل حسین تارڑ کے صاحبزادے، پاکستان مسلم لیگ (ن) پنجاب کی نائب صدر وسابق وفاقی وزیر سائرہ افضل تارڑ کے چھو ٹے بھائی چوہدری محمد ناصر تارڑ طویل علالت کے بعد 50سال کی عمر میں لاہور میں انتقال کر گئے۔
مرحوم طویل عرصے سے کینسر کے مرض میں مبتلا تھے جن کانہ صرف ملک کے بیشتر ہسپتالوں میں علاج کرایاگیا بلکہ انہیں علاج کی غرض سے بیرون ملک بھی لے جایا گیا مگر وہ جانبر نہ ہو سکے اور جمعہ کے روز لاہور کے نجی ہسپتال میں خالق حقیقی سے جا ملے۔ مرحوم کے جسد خاکی کو ان کے آبائی گاؤں کولو تارڑ حافظ آباد لایا گیا اور سینکڑوں سوگواروں کی موجودگی میں سپرد خاک کر دیا گیا۔ نماز جنازہ میں سیاسی شخصیات سابق و موجودہ اراکین اسمبلی سمیت زندگی کے مختلف شعبوں سے وابستہ نامور شخصیات نے شرکت کی۔
