اسلام آباد(این این آئی)گوگل نے پاکستان کے لئے اپنا نیا ڈوڈل پیش کردیا،گوگل نے اپنے اس نئے ڈوڈل کے ذریعے پاکستان میں عام انتخابات کی تاریخ کی یاد دہانی کروا دی۔گوگل نے پاکستان کے لئے عام انتخابات کی مناسبت سے اپنے ڈوڈل پر پاکستانی جھنڈا اور بیلٹ باکس نمایاں کر دیا۔گوگل پاکستان کے لئے اپنا ڈوڈل تبدیل کرتے ہوئے یاد دہانی کروا رہا ہے کہ پاکستان کے آئین کے مطابق رواں سال پاکستان میں عام انتخابات کا سال ہے۔

گوگل کے مطابق پاکستان میں قومی اسمبلیاں 13اگست کو تحلیل ہوجائیں گی جس کے بعد 60دنوں میں ملک بھر میں عام انتخابات کروانے لازمی ہوں گے،اس طرح ملک بھر میں قومی اور صوبائی اسمبلی کی نشستوں کے لئے 14 اکتوبر کو عام انتخابات کروانے ہوں گے۔دوسری جانب گوگل نے گزشتہ شب 12بجتے ہی پاکستان کے لئے اپنا ڈوڈل تبدیل کیا تو دیکھتے ہی دیکھتے یہ ٹوئٹر پر ٹرینڈ کرنے لگا۔ٹوئٹر صارفین بھی گوگل کے انداز پر دلچسپ تبصرے پیش کرتے ہوئے تعجب کا اظہار کر رہے ہیں اور کہہ رہے ہیں کہ کیا اب گوگل ہمیں بتائے گا الیکشن کب ہونے ہیں؟۔