مانسہرہ(این این آئی)سابق صوبائی وزیر سید احمد حسین شاہ نے تحریک انصاف چھوڑنے کا اعلان کردیا، نئے سیاسی لائحہ عمل کا اعلان بعد میں کریں گے۔سید احمد حسین شاہ نے مانسہرہ پریس کلب میں پریس کانفرنس سے خطاب کرتے ہوئے کہا کہ وہ 9 مئی کے واقعات کی مذمت کرتے ہیں۔پاک فوج کے خلاف سازش پاکستان کے خلاف سازش کے مترداف ہے۔

شہدا کی تکریم پر کوئی سمجھوتہ نہیں کریں گے۔انہوں نے کہا کہ وہ اپنے خاندان اور ووٹرز کے مشکور ہیں جنہوں نے ان کے فیصلے کی تائید کی۔ انہوں نے کہا کہ وہ آئندہ کا سیاسی لائحہ عمل کے لئے ووٹرز سے باہمی مشاورت کریں گے۔دوسری جانب ہزارہ ڈویژن کے 2اضلاع اپر و لوئر کوہستان سے دو سابق ممبران خیبر پختونخوا اسمبلی نے بھی تحریک انصاف چھوڑنے کا اعلان کر دیا۔

اپر کوہستان پی کے 25 سے سابق رکن صوبائی اسمبلی محمد دیدار خان اور پی کے 26 لوئر کوہستان سے سابق رکن صوبائی اسمبلی عبدالغفار شاہ نے پاکستان تحریک انصاف سے اپنی راہیں جدا کرنے کا اعلان کر دیا۔ انہوں نے 9مئی کے واقعات کی بھر پور مذمت کرتے ہوئے کہا کہ پاک فوج ہمارے ماتھے کا جھومر ہے، ہماری افواج کی وجہ سے ہمارے ملک کا دفاع ناقابل تسخیر ہے، ہم پاک فوج کے شانہ بشانہ کھڑے ہیں، پاک فوج ہے تو یہ وطن سلامت ہے، پاک فوج اور دیگر اداروں کا وقار، عزت و احترام لازم ہے، پارٹی احتجاج میں ہونے والے نعروں پر دل آزاری ہوئی ہے جس پر معذرت خواہ ہیں۔

موضوعات:پی ٹی آئی