لاہور ( این این آئی) لاہور ہائیکورٹ میں نواز شریف کی بطور مسلم لیگ (ن) کے صدر بحالی کے لیے درخواست دائر کر دی گئی۔ہائیکورٹ میں درخواست آفاق احمد ایڈووکیٹ نے دائر کی ہے جس میں موقف پیش کیا گیا ہے کہ 2017ء میں نواز شریف کو قومی اسمبلی سے نااہل قرار دیا گیا، ان کے خلاف عمران خان، شیخ رشید اور سراج الحق نے درخواست دائر کی تھی، 2018ء میں عدالت نے نوازشریف کو پارٹی صدارت سے ہٹانے کا حکم دیا۔درخواست میں موقف اپنایا گیا کہ سپریم کورٹ نے این اے 95 میانوالی سے عمران خان کو نااہل قرار دیا، شیخ رشید اور سراج الحق نے عمران خان کا ساتھ دیا، عمران خان، شیخ رشید اور سراج الحق صادق و امین نہیں رہے، عدالت نواز شریف کو پارٹی صدارت پر بحال کرنے کا حکم جاری کرے۔