اسلام آباد (این این آئی)سابق وزیراعظم عمران خان کی اہلیہ بشریٰ بی بی کی جانب سے قانونی نوٹس پر مسلم لیگ (ن) کی چیف آرگنائزر مریم نواز نے کہا ہے کہ چلیں اسی بہانے عدالت تو جائیں گے۔تفصیلات کے مطابق بشریٰ بی بی نے اپنے خلاف بیان کے معاملے پر مریم نواز کو قانونی نوٹس بھجوایا ہے۔

نوٹس میں مریم نواز سے 7 روز میں بشریٰ بی بی سے غیر مشروط معافی مانگنے کا مطالبہ کیا گیا ہے۔اس پر ردِ عمل دیتے ہوئے سینئر نائب صدر مسلم لیگ (ن) مریم نواز نے کہا کہ چلیں اسی بہانے عدالت تو جائیں گے۔مریم نواز نے کہاکہ عدالت جائیں گے تو ان کی اپنی ہی چوریاں کھلیں گی، انہی کو جواب دینا پڑے گا جس کے ثبوت اپنی ہی آواز میں ہیں۔

خیال رہے کہ بشریٰ بی بی کی جانب سے بھیجے گئے نوٹس میں کہا گیا تھا کہ مریم نواز نے یکم مئی کو لاہور میں بشریٰ بی بی کے خلاف جھوٹی، بے بنیاد الزام تراشی کی۔نوٹس میں کہا گیا کہ بیان واپس نہ لینے پر مریم نواز کے خلاف ضابطہ فوجداری، ہتکِ عزت کی کارروائی ہوگی۔