مریدکے(این این آئی) چند روز قبل مریدکے کے رہائشی تن ساز نوجوان کے قتل کا معمہ حل ہوگیا ، سگا بھائی قاتل نکلا جسے پولیس نے گرفتار کرکے واردات میں استعمال ہونے والا اسلحہ برآمد کر لیا ۔پولیس کے مطابق معروف تن ساز و پلے دار نفیس چیمہ کے اندھے قتل میں کوئی اور نہیں اس کا سگا بھائی ملوث نکلا ، ملزم عتیق چیمہ نے معمولی جھگڑے کے بعد اپنے بھائی نفیس کو گولی مار کر قتل کردیا۔پولیس کے مطابق موبائل فون ڈیٹا کی مدد سے ملزم عتیق کی گرفتاری عمل میں لائی گئی، ملزم نے قتل کے
بعد بھائی کی لاش کھیتوں میں پھینکی۔قانون کو دھوکہ دینے کیلئے ملزم نے مقتول نفیس کے سسرال کو مقدمے میں بھی پھنسانے کی کوشش کی، ملزم پولیس کے ساتھ مل کر قاتل تلاش کرنے کا ڈرامہ کرتا رہا۔پولیس کا کہنا ہے کہ جدید ٹیکنالوجی کی مدد سے مقتول کے چھوٹے بھائی عتیق چیمہ کو حراست میں لے کر تفتیش کی گئی تو ملزم نے اعتراف جرم کرتے بتایا اس نے اپنے بھائی کو معمولی جھگڑے کی وجہ سے قتل کیا۔
