کراچی(این این آئی)مسلم لیگ(ق)کے مرکزی سینئر نائب صدر ڈاکٹر غلام رضا چنہ نے تحریک انصاف سندھ کے صدر و وفاقی وزیر علی حیدر زیدی سے ملاقات کی اورپاکستان تحریک انصاف میں شامل ہوگئے۔تفصیلات کے مطابق پی ٹی آئی سندھ کے صدر و وفاقی

وزیر علی زیدی سے گھوٹکی سے تعلق رکھنے والے ڈاکٹر غلام رضا چنہ نے ملاقات کی۔وفاقی وزیر علی زیدی نے ڈاکٹر غلام رضا چنہ کو پی ٹی آئی میں شمولیت پر مبارکباد دی اور روایتی مفلر پہنا کر ان کا استقبال کیا۔ملاقات میں گھوٹکی سے کراچی مارچ کے حوالے سے تفصیلی گفتگو ہوئی۔اس موقع پرعلی زیدی نے کہاکہ سندھ سے سیاسی رہنما جوق در جوق پی ٹی آئی میں شامل ہورہے ہیں۔پی ٹی آئی سندھ کی سب سے بڑی جماعت بن کر سامنے آئے گی۔انہوں نے کہاکہ بہت جلد سندھ کے عوام کو زرداری مافیا سے نجات دلوائیں گے،2023میں پی ٹی آئی سندھ حکومت بنائے گی۔علی زیدی نے کہاکہ گھوٹکی سے کراچی مارچ سندھ کے حکمرانوں کی نیندیں اڑا دے گا۔