اسلام آباد (مانیٹرنگ+ این این آئی)اسلام آباد اور لاہور سمیت کئی شہروں میں موسلا دھار بارش ہوئی ہے اور آسمان پر گہرے بادلوں کا سایہ ہے، جس کی وجہ سے چاند نظر آنے کے امکانات بھی معدوم ہو گئے ہیں، یاد رہے کہ اس سے قبل محکمہ موسمیات نے واضح کیا تھا کہ ملک بھر میں چاند نظر آنے کے امکانات کم ہیں۔ دوسری جانب محکمہ موسمیات نے کہا ہے کہ بلوچستان کے مختلف اضلاع میں عید کے دوسرے اور تیسرے روز گرج چمک کے ساتھ بارش کا امکان ہے۔ محکمہ موسمیات نے ملک کے بالائی وسطی

علاقوں میں آئندہ 4 سے 5 روزکے دوران بارش کی پیشگوئی کی اور کہا کہ آئندہ 5 روز تک ان علاقوں میں مغربی ہواؤں کے موجود رہنے کی توقع ہے۔راولپنڈی، اسلام آباد، مری اور اٹک میں بھی وقفے وقفے سے اتوار تک بارش کا سلسلہ جاری رہے گا، مغربی ہواؤں کے باعث لاہور، جھنگ، سیالکوٹ میں بھی بارش جاری رہنے کی توقع ہے۔محکمہ موسمیات کے مطابق چکوال، جہلم، گجرات، حافظہ آباد اور فیصل آباد میں آندھی اور گرج چمک کے ساتھ بارش جبکہ بیشتر علاقوں میں ژالہ باری کا بھی امکان ہے۔