لاہور( این این آئی)پاکستان مسلم لیگ (ن) کے صدر شہبازشریف نے کہا ہے کہ مہنگائی کی طرح حکمرانوں کی بے حسی بھی تاریخ کے تمام ریکارڈ توڑ گئی ہے ،بلندوبانگ دعووںکے بجائے کاش حکمران ریاست مدینہ والا طرز عمل اپناتے ،موجودہ حکومت نے کم آمدن والے اور نادار طبقات کی زندگی جہنم بنادی ہے ۔ان خیالات
کا اظہار انہوں نے ارکان پارلیمان اور ٹکٹ ہولڈرز سے ملاقات میں گفتگو کرتے ہوئے کیا ۔اس موقع پر ملکی مجموعی صورتحال اور تنظیمی امور پر تبادلہ خیال کیا گیا ۔ شہبازشریف نے پارٹی رہنمائوں اور کارکنان کے جذبے، نظریاتی وابستگی اور سیاسی انتقام کا جرات سے مقابلہ کرنے کو سراہا ،پارٹی رہنمائوں کی جانب سے شہبازشریف کو رہائی پر مبارک ، سیاسی انتقام کے جرات مندانہ مقابلے پرپارٹی قیادت کو خراج تحسین پیش کیا۔شہباز شریف نے کہا کہ پہلا رمضان ہے جو قوم نے مہنگائی، کورونا، بیروزگاری، معاشی تباہی کے سبب پورا ہی شدید اذیت میں گزارا ہے،ملک میں مہنگائی بالخصوص کھانے پینے کی اشیاء کی قیمتوں میں بتدریج ہوشربا اضافہ ہورہا ہے ،پاکستان بیوروآف شماریات کے جاری کردہ حقائق اوراعدادوشمار اس عوام دشمن گھمبیر صورتحال کی نشاندہی کررہے ہیں،نااہلی، ہوس اور بے حسی مل کر پاکستان کو شدید نقصان پہنچا رہی ہے ۔ شہباز شریف نے ہدایت کی کہ اپنے اپنے حلقوں میں نادار اور کمزورطبقات کا خاص طورپر خیال رکھیں، کورونا وبا ء سے عوام کے بچائوکے لئے اپنی اپنی سطح پر بھرپور کردار ادا کریں۔
