اسلام آباد (این این آئی)نادرا کی جانب سے متعلقہ اداروں کی اجازت کے بغیر انٹرنیٹ ووٹنگ سسٹم ختم کر دینے کا انکشاف ہوا جس کے بعد انتخابی اصلاحات کے لیے قائم کمیٹی نے نادرا کو سات روز کے اندر انٹرنیٹ ووٹنگ سسٹم دوبارہ بحال کرنے کا حکم دے دیا۔ میڈیا رپورٹ کے مطابق
سمندرپار پاکستانیوں کے لیے بنائے گئے انٹرنیٹ ووٹنگ سسٹم کو ختم کرتے وقت الیکشن کمیشن سے اجازت نہیں لی گئی،الیکشن کمیشن کے انٹرنیٹ ووٹنگ سسٹم کے آڈٹ کے لیے آڈٹ ٹیم سے نادرا کے عدم تعاون پر بھی تحفظات کیا گیا ،وزارت انفارمیشن ٹیکنالوجی نے انٹرنیٹ ووٹنگ سسٹم کے آڈٹ کے لیے کنسلٹنٹ ٹیم بھی ہائر کر رکھی ہے۔ ذرائع کے مطابق انتخابی اصلاحاتی کمیٹی نے 31 مئی تک کنسلٹنٹس سے آئی ووٹنگ پر رپورٹ طلب کر لی،کنسلٹنٹس آئی ووٹنگ والے ممالک کا جائزہ لے کر کمیٹی کو تفصیلی رپورٹ پیش کریں گے۔
