پشاور ، اسلام آباد( آ ن لائن) حکومتی رہنما ایس او پیز کی دھجیاں اْڑا نے لگے۔پولیس نے خیبر پختونخواہ کے وزیر صحت کے خلاف مقدمہ درج کرلیا۔تفصیلات کے مطابق صوبائی دارالحکومت پشاور میں کرونا وبا کے باوجود صوبائی وزیر صحت تیمور سلیم جھگڑا نے کارکنوں کے اعزاز میں افطار ڈنر کا اہتمام کیا ، یہ تقریب ان کے حلقہ انتخاب میں واقع

ریسٹورنٹ میں منعقد کی گئی، جب کہ کارکنوں کو افطاری کی دعوت سوشل میڈیا پر دی گئی تھی۔ تصاویر میں دیکھا گیا کہ وزیر صحت سمیت بیشتر شرکا نے ماسک نہیں پہنے اور سماجی فاصلے کا بھی خیال نہیں رکھا ، کارکن صوبائی وزیر صحت کے ساتھ سیلفیاں بھی بناتے رہے۔تیمور سلیم جھگڑا نے وزیر صحت ہونے کے باوجود کورونا ایس او پیز کی خلاف ورزی کی۔پولیس نے کارکنان کے اعزاز میں افطار ڈنر اور ایس او پیز کی شدید خلاف ورزی پر صوبائی وزیر صحت تیمور سلیم جھگڑا، ریسٹورنٹ منیجر اور مالک پر مقدمہ درج کر لیا گیا ہے۔ دوسری جانب وزارت داخلہ نے عید الفطر کے دوران بین الصوبائی اور انٹرسٹی ٹرانسپورٹ پر پابندی لگانے کا اعلان کر دیا ہے اور اس حوالے سے نوٹیفکیشن بھی جاری کر دیا ہے، ترجمان وزارت داخلہ کے مطابق نیشنل کمانڈ اینڈ آپریشن سینٹر کے اجلاس میں اہم فیصلوں کی منظوری دی گئی ہے جس کی روشنی میں شب قدر،جمعة المبارک،نماز عید اور اعتکاف کے لئے ایس او پیز نہ

صرف بروقت جاری ہوں گے بلکہ عملدرآمد کو یقینی بنایا جائیگا۔عید کی چھٹیوں کے دوران اور اس کے بعد بھی 16 مئی تک ٹورازم پر مکمل پابندی ہوگی ،تمام سیاسی مقامات ،پبلک پارک ،ہوٹل بند رہیں گے ۔بین الصوبائی انٹرسٹی ٹرانسپورٹ عید کے دنوں میں نہیں چلے گی تاہم مقامی

افراد خصوصاً گلگت بلتستان کے لوگوں کو سفری اجازت ہوگی ۔ہوٹلز،ریسٹورنٹس ،شاپنگ مال اور ٹرانسپورٹ بند کر دی جائے گی ،مری گلیات،سوات ،کالام ،سی ویو،ساحل سمندر کے علاقے اور شمالی علاقہ جات پر بھی سیاح نہیں جا سکیں گے ،عید الفطر کے دوران بجلی کی بلا تعطل کی فراہمی کو یقینی بنایا جائیگا، گلگت بلتستان کے لوگوں کو واپس جانے کی اجازت ہوگی ،متعلقہ ٹاسک کے حوالے سے وزارت داخلہ وقتاً فوقتاً نوٹیفکیشن جاری کرتے رہے گی ۔