کراچی(این این آئی) ترجمان سندھ پولیس کے مطابق آئی آئی چندریگر روڈ پر ٹیلی کام سندھ پولیس میرپورخاص کے سب انسپکٹر مظفر علی نے خود سوزی کی کوشش کی تاہم موقع پر موجود پولیس اہلکاروں نے اسے فوری طور پر ریسکیو کیا اور سول اسپتال کے برنس وارڈ منتقل کیا۔ابتدائی اطلاع کے مطابق مذکورہ پولیس آفیسر کا جسم 41 فیصد تک جھلس گیا ہے، اسپتال میں پولیس کے

سینئر افسران موجود ہیں اور تمام تر طبی سہولیات کی فراہمی کو یقینی بنارہے ہیں۔آئی جی سندھ نے ڈی آئی جی ٹی اینڈ ٹی کو ہدایات جاری کی ہیں کہ مذکورہ پولیس آفیسر کو ہر ممکن طبی سہولیات کی فراہمی کو یقینی بنایا جائے ۔ مزید برآں اس واقعہ کی تفصیلات سے آگاہ کیا جائے اور انکوائری کی جائے کہ آخر کیا محرکات تھے کہ سب انسپکٹر نے یہ انتہائی اقدام اٹھایا۔