اسلام آباد (این این آئی)بلوچستان کے25 اضلاع میں 24 گھنٹوں سے کوئی ایک کرونا ٹیسٹ نہیں کیا گیا جبکہ17اضلاع میں پچھلے ایک ہفتے سے کوئی کرونا ٹیسٹ نہیں ہوا ۔ صوبے کے تین اضلاع صحبت پور، موسیٰ خیل اور گوادر میں کرونا کا صرف ایک، ایک ٹیسٹ کیا گیا۔دوسری جانب پاکستان میں عالمی وبا کورونا کی تیسری لہر کے دوران تشویشناک مریضوں کی
تعداد میں اضافے کے باعث ہسپتالوں پر شدید دباؤ بڑھنے لگا۔ذرائع کے مطابق ملک بھر میں 549 وینٹی لیٹرز پر کورونا کے مریض زیر علاج ہیں، مردان میں 95، گوجرانوالہ میں 88، ملتان 85 اور لاہور میں 82 فیصد وینٹی لیٹر زیر استعمال ہیں۔ ذرائع کے مطابق گوجرانوالہ میں 85 فیصد، پشاور میں 72 ، نوشہرہ میں 68 اور سوات میں 65 فیصد مریض آکسیجن بیڈز پر ہیں۔دوسری جانب وفاقی وزیر برائے منصوبہ بندی اور سربراہ این سی او سی اسد عمرنے کہاکہ کورونا کے تشویشناک مریضوں کی تعداد 4500 تک پہنچ گئی ہے جس کے باعث ہسپتال مسلسل بھر رہے ہیں۔ انھوں نے کہا کہ تشویشناک مریضوں کی موجودہ تعداد گزشتہ سال کی سب سے زیادہ تعداد سے 30 فیصد زائد ہے جبکہ آکسیجن کی فراہمی اس وقت دباؤ کا شکار ہے۔
