اسلام آباد(مانیٹرنگ ڈیسک)پنجاب حکومت نے شریف خاندان کی لاہور میں موجود رائیونڈ رہائش گاہ کی 127 کنال زمین کا انتقال منسوخ کردیا۔ میڈیا رپورٹس کے مطابق پنجاب حکومت کی جانب سے منسوخ کی گئی اراضی موضع

مانک رائے ونڈ میں شریف خاندان کے گھر کا مرکزی حصہ ہے۔ ذرائع کے مطابق پنجاب حکومت نے شریف خاندان کی رائیونڈ رہائش گاہ کی 127 کنال زمین کا انتقال منسوخ کردیا جب کہ پنجاب ریونیو ڈیپارٹمنٹ نے اس زمین کا انتقال واپس پنجاب حکومت کے نام بھی کردیا۔میڈیا ذرائع کا کہنا ہے کہ یہ زمین مرحومہ بیگم شمیم کے نام سے پنجاب حکومت کو منتقل کردی گئی،اس سلسلے میں اسسٹنٹ کمشنر رائیونڈ کو ہدایات بھی جاری کردی گئی ہیں۔ پنجاب حکومت نے دعویٰ کیا کہ شریف خاندان نے اوقاف کی زمین پر قبضہ کررکھا ہے۔پنجاب ریونیو ڈیپارٹمنٹ کسی بھی وقت زمین کا مبینہ قبضہ چھڑوانے کے لیے کارروائی کرسکتا ہے جب کہ پنجاب حکومت نے رائیونڈ میں زمین منسوخی کا عمل خفیہ رکھا ہوا ہے۔دوسری جانب شریف خاندان کے ذرائع کا کہنا ہے کہ پنجاب حکومت جاتی امرا گرانے کے لیے جعلی دستاویزات تیار کر رہی ہے، شریف خاندان نے یہ زمین 1992 ، 1997 اور 2015 میں خریدی تھی۔ اس بارے میں پنجاب حکومت کی جانب سے تاحال کوئی موقف سامنے نہیں آیا۔

موضوعات:رائیونڈ رہائش گاہ