کراچی(این این آئی)صدر وومن تھانے کی تین لیڈی کانسٹیبلزکو یہ ہماری گاڑی ہے ٹک ٹاک بنانا مہنگا پڑگیا ، ایس پی صدر نے تینوں لیڈی کانسٹیبلز کو معطل کر دیا ، لیڈی کانسٹیبلز نے سندھ اسمبلی کے قریب ڈیوٹی کے دوران ٹک ٹاک ویڈیوبنائی جو سوشل میڈیا پر وائرل ہوگئی۔تفصیلات کے مطابق ایس پی صدر ڈویژن زاہدہ پروین نے ڈیوٹی کے دوران ٹک ٹاک بنانے والی صدر وومن پولیس اسٹیشن ڈسٹرکٹ سائوتھ میں تعینات 3 لیڈی کانسٹیبلز طوبی علی، زہرہ مظہر اور تابندہ حفیظ کو معطل کر کے ایس ایس پی سائوتھ ریزور گزری
تبادلہ کر دیاہے۔معطل کی جانے والی تینوں لیڈی کانسٹیبل نے گزشتہ دنوں سندھ اسمبلی کے قریب ڈیوٹی کے دوران یہ ہماری گاڑی ہے کے جملے پر مبنی ٹک ٹاک کی طرز پر ویڈیو بنائی تھی جو سوشل میڈیا پر وائرل ہوگئی۔ویڈیو کے دوران انھوں نے ڈیوٹی کی ادائیگی کو خواری قرار دیا تھا، ویڈیو وائرل ہونے کے بعد جب اعلی پولیس افسران تک پہنچی تو انھوں نے سخت ناراضی کا اظہار کیا۔معاملے پر ایس پی صدر زاہد پروین نے فوری کارروائی کرتے ہوئے تینوں لیڈی کانسٹیبلز کو معطل کرنے کا حکم نامہ جاری کردیا۔
