اسلام آباد(مانیٹرنگ ڈیسک )اٹک میں ننھی کلی کی آبرو ریزی کے بعد ابدی نیند سلادیا گیا ہے۔پولیس کے مطابق دلخراش واقعہ اٹک میں پیش آیا، جہاں چھچھ انٹرچینج کے قریب سے آٹھ سالہ بچی کی لاش ملی، بچی کو نامعلوم درندوں نے مبینہ طور پرآبرو ریزی کے بعد پھندا ڈال کر ابدی نیند سلادیا۔
نجی ٹی وی اے آر وائی کے مطابق پولیس کی جانب سے جاری بیان کے مطابق گزشتہ رات کو اپنے والدہ کے ساتھ منگنی کی تقریب میں گئی تھی، رات گئے ہونے والی تقریب کے دوران بچی لاپتہ ہوگئی تھی، جس کی لاش آج صبح ملی ۔بچی کی شناخت فاطمہ کے نام سے ہوئی ہے، لاش کو پوسٹ مارٹم کے لئے حضرواسپتال منتقل کردیا گیا ہے۔واضح رہے کہ اسی طرح کا ایک اور دلخراش واقعہ گذشتہ روز شیخوپورہ کی تحصیل شرقپور شریف کے ڈھامکے میں پیش آیا، جہاں پانچ سالہ عبدالرحمن گزشتہ شام مدرسہ سے واپسی پر لا پتہ ہوا، بچے کی گمشدگی پر اہل خانہ نے فوری طور پر مقامی پولیس اسٹیشن میں رپورٹ درج کرائی،تلاش بھی کی گئی مگر ناکامی ہوئی۔آج صبح بچے کی ہاتھ پاوں بندھے ہوئی لاش برآمد ہوئی، واقعے کی اطلاع ملنے پر پولیس جائے حادثے پر پہنچی اور بچے کی لاش کو تحویل میں لے کر میڈیکل کے لیے اسپتال روانہ کیا اور جگہ کو سیل کردیا۔
