لاہور،ڈسکہ (آن لائن، این این آئی) پنجاب پولیس الیکشن کمیشن سے بھی ہاتھ کرگئی ، پولیس نے الیکشن کمیشن کے احکامات کی روشنی میں معطل کئے گئے پولیس افسران کی معطلی کی معمول کی رپورٹ اپنی فائلوں میں دبا دی ہے۔ بتایا گیا ہے کہ الیکشن کمیشن نے این اے حلقہ

75 ڈسکہ کے ضمنی انتخابات میں صورتحال خراب ہونے پر آئی جی پولیس پنجاب کو ایس ڈی پی او ڈسکہ اور ایس ڈی پی او سمبڑیال کو معطل کرنے کا حکم دیا تھا اور یہ حکم نامہ رواں ماہ 25 فروری کو جاری کیا گیا تھا۔ جس کے مطابق الیکشن کمیشن نے آئی جی پولیس پنجاب سے مذکورہ پولیس افسران کو معطل کرنے کے بعد رپورٹ فراہم کرنے کی بھی ہدایات جاری کیں تھیں۔ یہ بھی بتایا گیا ہے کہ آئی جی پولیس پنجاب نے مذکورہ افسران کو معطل تو کردیا۔ لیکن معطلی کے معمول کے احکامات جاری نہیں کئے اور خصوصی احکامات کو فائلوں میں دبا کر رکھ دیا ہے۔ دوسری جانب الیکشن کمیشن کے فیصلے کے بعد اسسٹنٹ کمشنر ڈسکہ کو معطل کر دیا گیا۔تفصیلات کے مطابق الیکشن کمیشن نے حلقہ این اے75سیالکوٹ /ڈسکہ میں 19 فروری کو ہونے والے ضمنی انتخابات کو کالعدم قرار دیتے ہوئے 18 مارچ کو پورے حلقے میں دوبارہ پولنگ کرانے کا حکم دیا تھا۔الیکشن کمیشن نے اسٹیبلشمنٹ ڈویژن کو حکم دیا تھا کہ این اے 75 سیالکوٹ IV میں ضمنی انتخاب میں بدامنی اور بے قاعدگیوں پر ڈپٹی کمشنر سیالکوٹ، ڈسٹرکٹ پولیس آفیسر سیالکوٹ اور اسسٹنٹ کمشنر ڈسکہ کو معطل کیا جائے۔

موضوعات:ڈسکہ ضمنی الیکشن