کراچی(مانیٹرنگ ڈیسک) سابق وزیر اعلیٰ سندھ سید قائم علی شاہ کی بیٹی اور رکن قومی اسمبلی نفیسہ شاہ کی بہن انتقال کرگئیں۔نجی ٹی وی چینل کی رپورٹ کے مطابق خاندانی ذرائع کا کہنا ہے کہ قائم علی شاہ کی بڑی بیٹی سیدہ نجمہ شاہ کچھ عرصے سے بیمار تھیں اور اسی بیماری کی بدولت وہ اس جہان فانی سے کوچ کر گئیں۔ مرحومہ کی نماز جنازہ خیرپور میں بروز جمعہ ادا کی جائیگی۔ واضح رہے کہ پاکستان مسلم لیگ (ن) کے رہنما اور سینیٹر مشاہد اللہ خان بھی علیل رہنے کے بعد وفات پا گئے ہیں، انہیں ایچ الیون قبرستان اسلا م آباد میں دفن
کیا گیا ہے، دوسری جانب اسپیکر قومی اسمبلی اسد قیصر اور ڈپٹی اسپیکر قاسم خان سوری نے ایوان بالا کے رکن سینٹر مشاہد اللہ خان کے انتقال پر گہرے دکھ اور افسوس کا اظہار کیا ہے۔ جمعرات کو اسپیکر و ڈپٹی اسپیکر نے مرحوم کے اہلخانہ کے نام اپنے علیحدہ علیحدہ تعزیتی پیغامات میں مشاہد اللہ خان کی وفات پر تعزیت کا اظہار کیا ہے۔انہوں نے کہا کہ مشاہد اللہ خان ایوان بالا کے ایک فعال رکن تھے، ان کی وفات سے پارلیمان ایک متحرک سیاسی رہنما سے محروم ہو گیا ہے،مرحوم کی سیاسی اور سماجی خدمات کو ہمیشہ یاد رکھا جائے گا۔
