لاہو ر(این این آئی ) پیپلزپارٹی کے چیئرمین بلاول بھٹو مسلم لیگ (ن) کی نائب صدر مریم نواز سے ملاقات کیلئے جاتی امراء پہنچ گئے ہیں  ۔ بلاول بھٹو مسلم لیگ (ن) کی نائب صدر مریم نواز سے ان کی دادی شمیم اختر کے انتقال پر اظہار تعزیت کی ۔ ذرائع نے بتایا ہے کہ 13دسمبر کو

ہونے والے جلسے اور دیگر امور پر تبادلہ خیال بھی کیاجائے گا ۔ دوسری جانب مسلم لیگ(ن)پنجاب کی سیکرٹری اطلاعات عظمی بخاری نے کہا ہے کہ فردوس باجی پی ڈی ایم ہی جعلی تبدیلی کا تابوت سمندر برد کرے گی،پارلیمنٹ اور پی ٹی وی پر حملہ کرنے والے شرپسند عناصر ہمیں درس نہ دیں۔ عظمی بخاری نے فردوس عاشق اعوان کے بیان پر ردعمل کااظہار کرتے ہوئے کہاکہ نوازشریف نے ایک ڈکٹیٹر سے سپریم کورٹ آزاد کرائی،نوازشریف ایک مرتبہ پھر ڈکٹیٹر کے چمچے وزیراعظم سے پارلیمنٹ کو آزاد کرائیں گے،جیسے جیسے 13دسمبر قریب آرہا ہے کرائے  کے ترجمانوں کو اپنی نوکریاں جاتی نظر آرہی ہیں۔ا نہوںنے کہاکہ لاہور نے ثابت کردیا مریم نواز ان کی ہر دلعزیز لیڈر ہیں۔ملکی اور غیر ملکی میڈیا مریم نواز کو کراڈ پلر قراردے چکا ہے۔انہوںنے کہاکہ جس دن مریم نواز پارلیمنٹ پہنچی سب مہرے،لوٹے اور چابی والے کھلونے پارلیمنٹ سے کِک آئوٹ ہونگے۔