اسلام آباد(مانیٹرنگ ڈیسک )پاکستان مسلم لیگ ن کے قائد و سابق وزیراعظم میاں نواز شریف نے والدہ کے تعزیتی پیغامات پر بھیجنے والوں کا شکریہ ادا کر دیا۔ تفصیلات کے مطابق سماجی رابطے کی ویب سائٹ ٹویٹر پر پیغام جاری کیا ہے کہ ہماری والدہ محترمہ کے انتقال پر مجھے پاکستان اور بیرونِ پاکستان سے لاتعداد تعزیتی پیغامات موصول ہوئے۔ میں دل کی گہرائی سے ان تمام
خواتین و حضرات کا شکرگزار ہوں جنہوں نے ہمارے غم میں شرکت کی اور ہماری والدہ محترمہ کے لئیے دعائے مغفرت فرمائی۔نواز شریف کا مزید کہنا تھا کہ میں ان سب کے لیے دعا گو ہوں کہ اللہ ان پر رحمتوں اور برکتوں کا سایہ قائم رکھے اور دنیا سے رخصت ہو جانے والے اُن کے پیاروں کی مغفرت فرمائے ۔
