سانگلہ ہل(آن لائن) پاکستان مسلم لیگ(ن) کے رکن قومی اسمبلی و سابق وفاقی وزیر امور کشمیر چوہدری برجیس طاہر نے کہا ہے کہ(ن) لیگ چٹان کی طرح مضبوط ہے،(ن) سے(ش)نہیں بلکہ مخالفین کیلئے شعلے نکلیں گے،ہمیں اپنے قائد میاں نوازشریف پر بھرپور اعتماد ہے،انکی ایک کال پر کسی قربانی سے دریغ نہیں کریں گے،وہ جب بھی کسی قسم کی کال دیں گے ن لیگ کا ہر رکن اور

رہنما تمام رکاوٹیں توڑ کر وہاں پہنچیں گے،مختلف بولیاں بولنے والے مخالفین کو شرمندگی کے سوا کچھ نہیں ملے گا،میاں شہبازشریف کو نوازشریف کا بھائی ہونے کی سزا دی جارہی ہے،دونوں بھائیوں میں کسی قسم کا اختلاف نہیں ہے۔ان خیالات کا اظہار انہوں نے گزشتہ روز اپنے عوامی دفتر میں میاں شہبازشریف کی گرفتاری کے بعد پارٹی ہدایات کے مطابق آئندہ کے لائحہ عمل کے سلسلہ میں کارکنوں کے اجلاس سے خطاب میں کیا۔اس موقع پر ایم پی اے میاں اعجاز حسین بھٹی اور سابق چیئرمین بلدیہ سانگلہ ہل چوہدری فقیر محمد بادشاہ بھی موجود تھے۔چوہدری برجیس طاہر نے مزید کہا کہ ن ش م کوہ ہمالیہ کی طرح مضبوط بلند اور ایک ہی ہیں،ان کو علیحدہ کرنے کی گردان کرنے والے مداری اپنی پٹاری اور تماشہ بند رکھیں۔بڑے دکھ کی بات ہے کہ موجودہ حکومت نے اپنی کامیابی کو نیب کی راہوں پر لگا رکھا ہے۔نیب کے ذریعے مخالفین اور خاص کر ن لیگ کو انتقامی سیاسی کارروائی کا نشانہ بنایا جارہا ہے،پاکستان ڈیموکریٹک موومنٹ کے فیصلے کے مطابق 11اکتوبر کو کوئٹہ میں ہونے والے جلسہ میں بھرپور شرکت کی جائے گی۔انہوں نے کہا کہ اے پی سی کے موقع پر میاں نوازشریف کے خطاب نے موجودہ حکومت اور انکے حواریوں کے ہوش اڑا دئیے ہیں اور وہ طرح طرح کی بولیاں بول کر اپنی نوکری پکی رکھنے کے عمل پر گامزن ہیں،مسلم لیگ(ن) کو مختلف طریقوں سے خوفزدہ کرکے

ختم اور نہ ہی توڑا جاسکتا ہے۔

موضوعات:برجیس طاہر کا دعویٰ