لاہور( این این آئی) پیپلز پارٹی وسطی پنجاب کے صدر قمر زمان کائرہ نے کہا ہے آج زرداری ہائوس اسلام آباد میں ایک تاریخی اورنتیجہ خیز سیاسی اجتماع ہوگا ،چیئرمین بلاول بھٹو کی میزبانی میں اے پی سی قومی سیاست میں اہم سنگ میل ثابت ہوگی۔اپنے بیان میں قمر زمان کائرہ نے کہا کہ اے پی سی کیخلاف وزرا ء کے بیانات ان کی قبل ازوقت

بوکھلاہٹ کو ظاہر کرتے ہیں،حکومت کے غیر جمہوری اور فاشسٹ طرز عمل نے اپوزیشن جماعتوں کو متحد ہونے پر اکسایا۔انہوں نے کہا کہ وکلاء  ،سول سوسائٹی ،مزدور ، کسان،طلبا ،صحافی اور تاجر سب حکومت سے تنگ آ چکے ہیں،سیاسی جماعتوں نے عوامی بیزاری کی اس لہرکی قیادت نہ کی تو یہ لاوا کسی اور طرح بھی پھٹ سکتا ہے ۔

موضوعات:قمر زمان کائرہ