لاہور، اسلام آباد (آن لائن، این این آئی) بورڈ آف انٹرمیڈیٹ اینڈ سیکنڈری ایجوکیشن لاہور کے زیر اہتمام ہونے والے میٹرک کے امتحانات کے نتائج سے متعلق تقریب منسوخ کردی گئی ہے جبکہ رواں سال لاہور بورڈ نے میٹرک کے امتحانات کے نتائج آن لائن جاری کرنے کا فیصلہ کیا ہے۔
یہ بھی بتایا گیا ہے کہ پنجاب بھر کے تعلیمی بورڈز نے اس مرتبہ میٹرک اور انٹرمیڈیٹ میں زیادہ نمبر لینے والوں کی پوزیشنیں ختم کرتے ہوئے امیدواروں کو صرف گریڈ دینے کا فیصلہ کیا ہے اور ان طلباء اور طالبات کی گریڈ کی بنیاد پر مختلف کالجوں میں داخلہ کئے جائیں گے۔ دریں اثناوفاقی تعلیمی بورڈ نے میٹرک کے سالانہ امتحان 2021 کے لیے معمول کے نصاب کو کم کرنے کی منظوری دے دی۔میڈیا رپورٹ کے مطابق میٹرک کے طلبہ و طالبات کے لیے اچھی خبر ہے کہ وفاقی تعلیمی بورڈ نے میٹرک کے سالانہ امتحان 2021 کے لیے معمول کے نصاب کو کم کرنے کی منظوری دیدی ہے۔وفاقی تعلیمی بورڈ کے مطابق موجودہ حالات میں طلبہ کی سہولت کے پیش نظر فیصلہ کیا گیا کہ امتحان 2021 کے لئے معمول کے نصاب کو کم کیا جائے، نصاب وفاقی تعلیمی بورڈ کی ویب سائٹ پر آویزاں کر دیا گیا ہے، طلباو اساتذہ نصاب ویب سائٹ سے ڈاون لوڈ کرسکتے ہیں۔
