لاہور( این این آئی) ترجمان پنجاب حکومت مسرت جمشید چیمہ نے کہا ہے کہ مسلم لیگ (ن) نے کشکول متعارف کرایا اور ملک کو قرضوںکی دلدل میں دھکیلا ، شہباز شریف جشن آزادی کے موقع پر بھی اپنی سیاست چمکانے سے باز نہیں آئے لیکن اس طرح وہ اپنی ڈوبتی ہوئی سیاست کو نہیں بچا سکیں گے ،
انشااللہ وزیر اعظم عمران خان کی قیادت میں پاکستان کو قرضوں سے بھی نجات دلائیں گے اور معیشت کو بھی مستحکم کریں گے ۔ ان خیالات کا اظہارانہوںنے حضوری باغ میں جشن آزادی کی تقریب کے موقع پر میڈیا سے گفتگو کرتے ہوئے کیا ۔ ترجمان پنجاب حکومت مسرت جمشید چیمہ نے کہا کہ کسی نے مسلم لیگ (ن) کو سیاسی انتقام کا نشانہ نہیں بنایا بلکہ مسلم لیگ (ن) اپنے اعمالوں کی وجہ سے اس نہج پر پہنچی ہے ۔ شہباز شریف درست کہتے ہیں کہ انہوںنے اور ان کی جماعت نے دھیلے کی نہیں بلکہ اربوں ،کھربوں کی کرپشن کی ہے ۔ بتایا جائے سابقہ دور میں کس نے اربوں ڈالر کے مہنگے ترین کمرشل قرضے لئے اور آج کشکول توڑنے کی باتیں کی جارہی ہیں۔ آپ کی جماعت نے اربوں ڈالر کے قرضے لئے اور ایسے منصوبے شروع کئے جس سے صرف آپ کی اناء کوتسکین ملی اور آپ کی اور آپ کے حواریوں کی جیبیں گرم ہوئیں ۔ انشا اللہ وزیر اعظم عمران خان کی قیادت میں پاکستان کے قرضے بھی اتاریں گے اور معیشت کو بھی استحکام دیں گے ۔ انہوںنے کہا کہ پاکستانی قوم نے 73واں یوم آزادی اس عزم اور تجدید عہدکے ساتھ منایا ہے کہ ملک سے کرپشن کے ناسور کو جڑ سے اکھاڑ پھینکا جائے گا اور اس کی آبیاری کرنے والوں کابھی محاسبہ ہوگا ۔
