اسلام آباد (آن لائن) تحریک انصاف کے رہنما راجہ ریاض نے انکشاف کیا ہے کہ وزیر اعلیٰ پنجاب عثمان بزدار کے خلاف پارٹی کے اندر سے ہی سازشیں ہورہی ہیں وزارت اعلیٰ کے خواہشمند عثمان بزدار کے خلاف سازشیں کرتے ہیں، تحریک انصاف حکومت ابھی تک وعدے پورے نہیں کر پائی، گورننس بہتر نہ ہوئی تو حکومت کمزور ہو گی اور مسلم لیگ (ن) کو فائدہ ہوگا۔پیر کے روز نجی ٹی وی سے گفتگو کرتے ہوئے
تحریک انصاف کے فیصل آباد سے رکن قومی اسمبلی راجہ ریاض نے کہا ہے کہ اپوزیشن جماعتوں میں حکومت گرانے کا دم خم نہیں ہے مولانا فضل الرحمن مسلم لیگ ن اور پیپلز پارٹی سے ناراض ہیں اور دونوں جماعتوں کے ساتھ بات کرنے کے لیے تیار نہیں ہیں اور اب انہوں نے مذہبی جماعتوں کے ساتھ رابطے کرنا شروع کر دیے مسلم لیگ ن کے لوگ اپنی قیادت کے نیب کیسز ختم کروانے کے لئے بھاگ دوڑ میں مصروف جبکہ پیپلز پارٹی بھی آصف زرداری کے خلاف کیسز میں ریلیف حاصل کرنے کی تگ و دو کر رہی ہے انہوں کہا کہ اپوزیشن میں کوئی دم خم نہیں ہے لیکن ہمیں اپنی اصلاح کرنی چاہیے گڈ گورننس اور لوگوں کو نوکریاں دینی چاہئیں جبکہ وزیراعظم عمران خان کے قوم کے ساتھ کئے گئے وعدے بھی ضرور پورے کرنا ہوں گے راجہ ریاض نے کہا کہ اپوزیشن تو کمزور ہے مگر حکومت میں بھی بہت کمزوریاں ہیں حکومت ابھی تک اپنے وعدے پورے نہیں کر پائی گڈگورننس نہ ہوئی تو حکومت کمزور ہو گی جبکہ اس کا فائدہ مسلم لیگ ن کو ہوگا انہوں نے کہا کہ اب بھی وقت ہے کہ ہم اپنی اصلاح کرلیں اور لوگوں کو ریلیف دیں راجہ ریاض نے کہا کہ وزیراعظم عمران خان کو وزیر اعلیٰ پنجاب عثمان بزدار پر مکمل اعتماد ہے عثمان بزدار کے خلاف تحریک انصاف کے اندر سازشیں ہورہی ہیں وزارت اعلی کے خواہشمند افراد عثمان بزدار کے خلاف سازشیں کرتے ہیں انہوں نے کہا کہ وزیراعظم عمران خان نے بیوروکریسی کی من مانیوں پر قابو پا لیا ہے اپنے حالیہ دورہ لاہور کے دوران عمران خان نے بیوروکریسی کو باور کروایا ہے کہ حکومت نے بیورو کریسی کی ساری باتیں مان کر تمام سہولتیں دی ہیں اب جو کام نہیں کر ے گا وہ سزاکے لئے تیار ہوجائے۔
