اسلام آباد (آن لائن) مسلم لیگ (ن) کے رہنما میاں جاوید لطیف نے دعوی کیا ہے کہ مسلم لیگ (ن) نے تحریک انصاف کی حکومت گرانے کا فیصلہ کرلیا ہے اے پی سی میں حکومت گرانے کا وقت اور طریقہ کار طے کیا جائے گا شاہد خاقان عباسی موقف تبدیل کرنے پر قوم اور اداروں سے معافی مانگیں۔

اتوار کے روز نجی ٹی وی سے گفتگو کرتے ہوئے مسلم لیگ (ن) کے رہنما میاں جاوید لطیف نے کہا ہے کہ سابق وزیراعظم شاہد خاقان عباسی کا دوبیانیے والا چکر ہے اگر ان کا پہلا بیان غلط تھا تو وہ اداروں اور قوم سے معافی مانگیں انسان کو اپنے موقف پر قائم رہنا چاہیے مشکلات میں گھبرا کر موقف میں تبدیلی نہیں آنی چاہیے جاوید لطیف نے کہا کہ مسلم لیگ نون اور پیپلز پارٹی میں موجود کچھ لوگ چور دروازے سے حکومت گرانا چاہتے ہیں لیکن یہ اداروں اور ریاست کے مفاد میں نہیں ہوگا البتہ مسلم لیگ (ن) نے اپنے طور پر تحریک انصاف کی حکومت گرانے کا فیصلہ کرلیا ہے مسلم لیگ (ن) اپنا فیصلہ متحدہ اپوزیشن کے سامنے رکھے گی اور حکومت گرانے کے لیے فیصلہ کن راؤنڈ میں جائیں گے اپوزیشن کی آل پارٹیز کانفرنس میں حکومت گرانے کا وقت اور طریقہ کار طے کیا جائے گا انہوں نے کہا کہ ہماری جماعت کے 99 فیصد لوگوں کا خیال ہے کہ اب ہمیں باہر نکلنا چاہیے آج اگر قوم کی آواز نہ بنے تو کل کس منہ سے عوام کے پاس جائیں گے جاوید لطیف نے کہا کہ پارٹی کا ہر شخص پارٹی فیصلوں کا پابند ہے شہبازشریف بھی جماعت کی رائے سے باہر نہیں جا سکتے۔