نارنگ منڈی ( این این آئی)پاکستان مسلم لیگ (ن) کے مرکزی نائب صدر اور چیئرمین پبلک اکائونٹس کمیٹی رانا تنویر حسین نے کہا ہے کہ مقبوضہ کشمیر کے مظلوم کشمیری مسلمانوں کو بھارت نے ایک سال سے لاک ڈائون کر کے قید کر رکھا ہے اور مقبوضہ کشمیر بہت بڑی جیل کی شکل اختیار کر چکا ہے ، بھارت مسلمانوں کیلئے خطرہ بن چکا ہے ہمیں نریندر مودی کے ہاتھ کاٹ کر ہی پاکستان کی شہ رگ کو آزاد کرانا ہو گا۔
میڈیا سے گفتگو کرتے ہوئے انہوں نے کہا کہ مسئلہ کشمیر کو اقوام متحدہ کی سیکورٹی کونسل میں دوبارہ اٹھایا جائے بھارت کے اقتصادی بائیکاٹ کی قرار داد بھی پیش کی جائے تاکہ بھارت پر موثر دبائو ڈالا جا سکے کہ وہ مقبوضہ کشمیر میں عائد لاک ڈائون فوری ختم کرے ۔ انہوں نے کہا کہ پانچ اگست کو قوم نے حکومت کی ناکام کشمیر پالیسی کی برسی منا ئی ۔ا نہوں نے کہا کہ نہتے کشمیری ڈٹ کر بھارت کا مقابلہ کر رہے ہیں ہمیں بھارت سے اسی زبان میں بات کرنی ہو گی جو زبان بھارت آزاد کشمیر کے بارے میں استعمال کرتا ہے جبکہ بھارت میں آباد ہندوئوں کو کشمیریوں کے حقوق پر ڈاکہ ڈالنے کیلئے کشمیر کے ڈومیسائل دئیے جا رہے ہیں مقبوضہ کشمیر میں غیر آئینی بھارتی اقدامات کے خلاف پوری دنیا میں مودی سرکار کو نفرت کی نگاہ سے دیکھا جا رہا ہے ۔انہوں نے کہا کہ عمران خان حکومت نے کشمیر کاز کو جتنا نقصان پہنچایا اس کی مثال نہیں ملتی موجودہ حکومت نے سلامتی کونسل میں بھارت کو بلا مقابلہ ممبر بننے میں مدد کی ۔انہوں نے کہا کہ ملک پر مسلط کردہ حکومت عوامی مینڈیٹ کی حامل ہی نہیں ہے جن مذموم مقاصد کی تکمیل کیلئے انہیں مسلط کیا گیا اب صورتحال ان مذموم مقاصد سے کہیں آگے نکل چکی ہے ملک کو داخلی و خارجی مسائل سے دوچار کر دیا گیا ہے اس سے محب وطن حلقوں کی تشویش میں اضافہ ہو رہا ہے ۔ انہوں نے کہا کہ او آئی سی اگر مسئلہ کشمیر کو امہ کا مسئلہ نہیں سمجھتی تو ہمیں بھی تنظیم کو چھوڑ دینا چاہیے ۔
