اسلام آباد (این این آئی)5 اگست کو ملک بھر میں یوم استحصال کشمیر منایا جائیگا، نماز فجر کے بعد مساجد میں کشمیر ، فلسطین کے مظلوموں کیلئے دعا کی جائے گی اور ملک بھر میں اجتماعات ، کانفرنسیں اور مظاہرے کیے جائیں گے،جمعۃ المبارک کو یوم سیدنا عثمان غنیؓ کے موقع پر مظلوم کشمیری عوام کے ساتھ اظہار یکجہتی کی قراردادیں منظور کی جائیں گی ۔ یہ بات چیئرمین پاکستان علماء کونسل
وصدر دارالافتاء پاکستان حافظ محمد طاہر محمود اشرفی نے مختلف مکاتب فکر کے علماء و مشائخ سے گفتگو کرتے ہوئے کہی، اس موقع پر مولانا نعمان حاشر ، مولانا محمد شفیع قاسمی ،مولانا اسد اللہ فاروق، علامہ زبیر عابد ، علامہ طاہر الحسن ، مولانا طاہر عقیل اعوان ، مولانا عبد الحکیم اطہر، مولانا ابو بکر صابری ، مولانا اسلم صدیقی ، مولانا عمار بلوچ مولانا شعیب بخاری بھی موجود تھے۔ انہوں نے کہا کہ مقبوضہ کشمیر میں کرفیو کو ایک سال کا عرصہ گذر گیا ، عالمی دنیا کی خاموشی اور بے حسی افسوسناک ہے۔ کشمیری مظلوموں کی تائید و حمایت کیلئے پوری قوم حکومت اور افواج پاکستان کے شانہ بشانہ ہے۔ انہوں نے کہا کہ 5 اگست کو تمام مکاتب فکر کے علماء و مشائخ اور پاکستانی عوام یوم استحصال کشمیر منائے گی ، مساجد میں نماز فجر کے بعد کشمیری اور فلسطینی مظلوم مسلمانوں کیلئے خصوصی دعائیں ہوں گی۔ ملک بھر میں مظلوم کشمیریوں کی تائید و حمایت میں اجتماعات ہوں گے اور ہندوستانی مظالم کی مذمت کی جائے گی۔ انہوں نے کہا کہ کشمیر کے مسئلہ پر آئی اوسی اور اقوام متحدہ کو عملی کردار ادا کرنا ہو گا، مودی کی حکومت مقبوضہ کشمیر میں ہندو ا?بادکاری کرنے کی سازش کر کے خطہ کو آگ میں ڈال رہی ہے۔ ہندو آباد کاری کومقبوضہ کشمیرمیں روکنا عالمی قوتوں کی ذمہ داری ہے۔
