لاہور (آن لائن) پاکستان مسلم لیگ (ن) پنجاب کے صدر اور رکن قومی اسمبلی رانا ثناء اللہ نے وزیراعظم عمران خان اور وزیر ہوا بازی غلام سرور سے مستعفی ہونے کا مطالبہ کرتے ہوئے کہا ہے کہ پی ٹی آئی کی حکومت نے پی آئی اے کو دفن کر دیا ہے، حکومت نے پائلٹ کا ملبہ (ن) لیگ پر ڈالنے کی کوشش کی مگر حکومت اپنی اس کوشش میں ناکام رہی، ماڈل ٹاؤن میں پریس کانفرنس سے خطاب کرتے ہوئے رانا ثناء اللہ نے کہا کہ
کچھ قوتوں نے پاکستان کے عوام پر ایسے ٹولے کو مسلط کر دیا ہے جس نے عوام کو مایوس کیا ہے اور اس ٹولے نے عوام کو مہنگائی اور بحرانوں کی دلدل میں دھکیل دیا ہے، انہوں نے کہا کہ حکومت نے عوام کے ساتھ جھوٹے وعدے کیے تھے جبکہ پائلٹوں کے حوالے سے حکومتی حکمت عملی کی وجہ سے پوری دنیا میں پاکستان کی بدنامی ہوئی ہے، انہوں نے کہا کہ پی ٹی آئی ملک میں تکبر، انتقام اور نفرت کی پالیسی کے تحت حکمرانی کر رہی ہے۔ پی ٹی آئی حکومت کی وجہ سے سے پاکستانی پائلٹس کو شرمندگی کا سامنا کرنا پڑا ہے، مختلف سوالوں کا جواب دیتے ہوئے رانا ثناء اللہ نے کہا کہ مافیا اب آپ کے ساتھ ہے اور مافیا ایک رکن کو آپ نے باہر بھیج دیا ہے، 2017ء میں انکوائری کمیشن سے متعلقہ قانون میں ترمیم کی گئی تھی اور اس ترمیم کے بعد چینی، گندم، پٹرول بحرانوں کی انکوائری کمیشن کی رپورٹ شائع کرنا حکومت کا کام تھا، آج چینی 90 روپے کلو فروخت ہو رہی ہے، چینی کی قیمت میں خود ساختہ اضافے کا ریکارڈ باقاعدہ موجود ہے، انہوں نے کہا کہ جب مافیا آپ پر لگائے گا تو مافیا وصول بھی کرے گا، رانا ثناء اللہ کا کہنا تھا کہ پاکستان مسلم لیگ (ن) کی حکومت میں چینی 53 روپے فی کلو تھی اور آج 20 کلو آٹے کے تھیلا 1170 روپے میں مل رہا ہے، انہوں نے حکومت کو خبردار کیا کہ ملک میں آٹے کا بحران سر اٹھا رہا ہے اور اس بحران سے ملک میں افراتفری اور انارکی پھیل سکتی ہے، حکومت نیب کو اپنے گھٹیا مقاصد کے لئے گھٹیا طریقے سے استعمال کرنے کے بجائے اپنی گورننس کی طرف توجہ دے جو بالکل نہیں ہے۔ رانا ثناء اللہ نے نیب پر الزام عائد کیا کہ نیب ایم پی ایز کو مشورہ دے رہا ہے کہ وہ وزیراعلیٰ اور وزیراعظم کو جا کر ملیں، انہوں نے کہا کہ پاکستان مسلم لیگ (ن) نے نیب کے تمام کیسز کو مسترد کر دیا ہے کیونکہ نیب حکومت ہتھیار بن چکا ہے۔
