مریدکے(آن لائن) اندرون شہر کی صفائی پر مامور نجی کمپنی نے لاکھوں روپے ماہانہ وصول کرنے کے با وجود شہر کے اہم ترین حصے کو کچرے کا ڈھیر بنا دیا۔ کئی کئی روز تک کوڑا کرکٹ نہ اٹھانے کے باعث علاقہ بھر میں تعفن پھیل گیا اور شہری مختلف بیماریوں میں مبتلا ہونے لگے۔

شہریوں نے سیکرٹری بلدیات سے ٹھیکہ کی فوری منسوخی کا مطالبہ کیا ہے۔ بتایا گیا ہے کہ میونسپل کارپویشن مریدکے کے ایک سابق میونسپل آفیسر نے لاہور کی نجی کمپنی کے ساتھ مبینہ ملی بھگت سے اندرون شہر کی صفائی کا نظام سرکاری اہلکاروں کے بجائے منظور نظر نجی کمپنی کے حوالے کر دیا۔ کمپنی نے شہر کی صفائی کی طرف توجہ دینے کے بجائے متعلقہ آفیسر کو خوش کرنا شروع کر رکھا ہے جس کے باعث شہر کی گلیاں کچرے کے ڈھیر سے اٹی پڑی ہیں۔ کمپنی کے اہلکار شہریوں سے صفائی کے بدلے نقد رقوم کا مطالبہ کرتے ہیں اور منتھلی نہ دینے والوں کی گلیوں کو کوڑا کرکٹ کے حوالے کر دیا جا تاہے۔ کچرے کے ڈھیروں کے باعث شہری بیماریوں میں مبتلا ہو رہے ہیں۔ شہریوںنے سیکرٹری بلدیات پنجاب سے مطالبہ کیا ہے کہ نجی کمپنی کا ٹھیکہ فی الفور منسوخ کرکے سرکاری اہلکاروں کو صفائی پر مامور کیا جائے۔