ملتان(این این آئی) نشتر ہسپتال میں عالمگیر وبا کورونا وائرس سے پہلی لیڈی ڈاکٹر جاں بحق ہو گئیں ۔نشتر ہسپتال کے فوکل پرسن ڈاکٹر ارشد کے مطابق نشتر میڈیکل یونیورسٹی کی سینئر ڈاکٹر غزالہ کئی دنوں سے آئی سی یو میں زیرعلاج تھیں، ڈاکٹر غزالہ نشتر  یونیورسٹی میں فارما کالوجی کی پروفیسر تھیں۔ڈاکٹر ارشد نے بتایا کہ ڈاکٹر غزالہ کو

اچانک ہی بخار اور کھانسی کا حملہ ہوا جس کے بعد انہیں نشتر ہسپتال آئی سی یو منتقل کیا گیا تاہم وہ جانبر نہ ہو سکیں۔ڈاکٹر غزالہ کی 3 بیٹیاں ہیں اور ان کی ایک بیٹی ڈاکٹر ، دو بیٹیاں ابھی پڑھ رہی ہیں۔واضح رہے کہ نشتر ہسپتال کے آئی سی یو میں کورونا وائرس کے 61 مریض زیرعلاج ہیں جبکہ نشتر ہسپتال میں کورونا وائرس سے 75 افراد جاں بحق ہو چکے ہیں۔‎