لاہور(اے این این)کورونا وائرس کے باعث لاک ڈاون کی وجہ سے سرحد بند ہونے کے باعث بھارت میں پھنس جانے والے 175 پاکستانی بھارتی سرحدی علاقے اٹاری پہنچ گئے۔ واہگہ بارڈر امیگریشن کے بعد یہ پاکستانی واہگہ بارڈرکے راستے پاکستان آئے ہیں۔
بھارت سے آنے والے پاکستانیوں کو قرنطینہ منتقل کیا گیا ہے،کورونا وائرس کے ٹیسٹ کلیئر ہونے پر انہیں گھر جانے کی اجازت ہوگی۔ بھارت میں پھنسے ہوئے پاکستانیوں کی بھارت سے آمد کے لیے واہگہ اٹاری بارڈر ایک بار پھر خصوصی طور پر کھولا گیا ہے۔واضح رہے کہ گزشتہ روز کورونا وائرس کے باعث لاک ڈاون کی وجہ سے سرحد بند ہونے سے بھارت میں پھنسے پاکستانی شہریوں کو وطن واپس آنے کی اجازت مل گئی تھی۔بھارت میں پھنسے پاکستانیوں کو گزشتہ شام تک بھارتی شہر امرتسر پہنچنا تھا جہاں سے وہ پاکستان کے لیے روانہ ہوئے۔یہ پاکستانی شہری بھارتی ریاستوں مہاراشٹر، چھتیس گڑھ، ہریانہ، اتر پردیش اور پنجاب کے مختلف شہروں میں پھنسے ہوئے تھے۔بھارتی دارالحکومت نئی دہلی میں پاکستانی ہائی کمیشن نے پاکستانیوں کی واپسی کے انتظامات کیے ہیں۔
