اسلام آباد (این این آئی)پاکستان مسلم لیگ (ن) کے صدر اور قائد حزب اختلاف شہبازشریف نے یوم القدس پر فلسطینی عوام کے ساتھ یک جہتی کا اظہار کرتے ہوئے کہاہے کہ مقبوضہ فلسطین اور مقبوضہ کشمیرکے عوام کو انصاف ملنے تک اقوام متحدہ، سلامتی کونسل کی ساکھ پر سوال رہے گا ۔ اپنے بیان میں انہوںنے کہاکہ نہتے فلسطینیوں اور کشمیریوں کے جائزقانونی حق کو اسرائیل اور بھارت پامال کررہے ہیں ۔

انہوںنے کہاکہ اسرائیل اور بھارت انسانیت کے قاتل بن چکے ہیں۔ انہوںنے کہاکہ امت مسلمہ فلسطین اور مقبوضہ کشمیر کے مظلوم مسلمانوں کی قرض دار ہے ۔ انہوںنے کہاکہ فلسطین اور کشمیر کے شہداء کو سلام ہے جن کا لہو دنیا سے انصاف کا تقاضا کرتا ہے ۔ انہوںنے کہاکہ یروشلم، گولان کی پہاڑیوں اور جنوبی اردن کے معاملے پر امریکی یک طرفہ اقدامات سلامتی کونسل کی قراردادوں کے منافی ہیں۔ انہوںنے کہاکہ ظالموں کا ساتھ دے کرامریکہ دنیا میں متنازعہ اور نفرت کا نشانہ بن چکا ہے ،یوم القدس کا تقاضا ہے کہ قبلہ اول کی آزادی اور فلسطینیوں کے حق کا دفاع امت کی اجتماعی ذمہ داری ہے ،امت کی سطح پر فلسطین اور مقبوضہ کشمیر کے لئے مشترکہ حکمت عملی تیار ہونی چاہئے ۔ انہوںنے کہاکہ او آئی سی کواسلامی دنیا کے ان کلیدی تنازعات پر امت کی توقعات پر پورا اترنے کے لئے کام کرنا ہوگا ،اللہ تعالی سے دعا ہے کہ شہداء کے درجات بلند فرمائے اور مظلوم اہلخانہ کو صبر جمیل دے۔

موضوعات:قائد حزب اختلاف شہبازشریف یوم القدس