اسلام آباد (این این آئی)چیئرمین سینیٹ قائمہ کمیٹی داخلہ سینیٹر رحمان ملک کا لاہور کے جیل میں قیدی خواتین سے زیادتی کے متعلق ویڈیو کا نوٹس لتے ہوئے ذیلی کمیٹی تشکیل دیدی جبکہ وفاقی سیکرٹری داخلہ، آئی جی پولیس و ہوم سیکرٹری پنجاب کو مبینہ ویڈیو و الزامات کی فوری انکوائری کرنے کی احکامات جاری کر دیئے۔
ایک بیان میں رحمن ملک نے کہاکہ خواتین قیدیوں کو حراساں کرنے کی معاملے کی انکوائری کرکے کمیٹی کو مفصل رپورٹ جمع کیا جائے، انہوں نے کہاکہ ذیلی کمیٹی تشکیل جو خواتین قیدیوں کیساتھ ناروا سلوک و زیادتی کی شکایات کی انکوائری کی نگرانی کریگی، سینیٹ قائمہ کمیٹی داخلہ کی ذیلی کمیٹی ملک بھر کے تمام جیلوں کا جلد دورہ بھی کریگی۔انہوں نے کہاکہ خاتون قیدی کے الزامات نہایت سنگین و دلخراش ہیں جسکی تفتیش نہایت ضروری ہے، مبینہ خاتون قیدی کی ویڈیو کی فورنزک لیبارٹری سے تصدیق کی جائے۔سینیٹر رحمان ملک نے کہاکہ اگر جیل حکام اسطرح کی گھناؤنی جرائم میں ملوث پائے گئے تو مثالی سزا دی جائے، خواتین قیدیوں سے ناروا سلوک وحراساں کرنے کی شکایات پہلے بھی کمیٹی کو موصول ہوئی ہیں، سینیٹ کمیٹی برائے داخلہ پہلے خواتین قیدیوں کے لئے علیحدہ انتظامیہ کی سفارشات کر چکی ہے۔ سینیٹر رحمان ملک نے کہاکہ وقت کی ضرورت ہے کہ قیدی خواتین کیلئے علیحدہ جیل اور خواتین عملہ و انتظامیہ ہو۔
