لاہور( این این آئی ) پنجاب حکومت نے لاک ڈائون میں نرمی کے بعد 26 سے زائد صنعتوں او ران سے متعلقہ دکانوںکو پیر کے روز سے کھولنے کی اجازت دیدی ہے ۔وزیراعلی پنجاب عثمان بزدار کی منظوری سے 26 مزید صنعتوں کا نوٹیفکیشن جاری کردیا گیا۔

محکمہ صنعت و تجارت پنجاب نے متعلقہ انڈسٹریز کے لئے ایس اوپیز بھی جاری کردیئے ہیں۔ دفاع سے متعلقہ اشیا ء تیار کرنے والی انڈسٹری ،پاورلومز، فوڈ انڈسٹری، فلاور ملز، پولٹری فیڈ ملز، رائس ملز ،لائیو اسٹاک سے متعلقہ کاروبار ،حفاظتی لباس، ماسک، گلوز تیار کرنے، اسٹوریج، پرنٹنگ، پیکنگ ،دودھ اور دودھ سے بننے والی اشیا ء ،سینی ٹائرز، صابن، ٹشو پیپرز ،آئل اینڈ گیس پرڈوکشن کمپنیوں، پاک عرب ریفائنری کمپنی، کھاد بنانے والے فیکٹریوں کو پرڈوکشن، ٹرانسپورٹیشن، اسٹوریج ،ٹریکٹر، تھریشر، ہارویسٹر بنانے والی کمپنیوں بیج، کھاد، زرعی ادویات، جانوروں کے چارے کی دکانوں کو کام کرنے کی اجازت دیدی گئی ہے۔جن صنعتوں کو کاروبارکی اجازت دی گئی ان سے وابستہ شعبوں کو بھی کام کی اجازت ہوگی۔ میچ باکس، ایل پی جی آئوٹ لٹس، سوڈا ایش انڈسٹری کو بھی اجازت مل گئی۔ موبائل فون بنانے والے کمپنیوں، اینٹوں کے بھٹے، ریت بجری، سیمنٹ، چھتیں تیار کرنے والے کارخانے بھی آج سے کھل جائیں گے اورسائیکل، موٹر سائیکل، کار کے انڈسٹری کو بھی کھول دیا گیا ہے۔