اسلام آباد (آن لائن )پاکستان پیپلز پارٹی خیبرپختونخواہ کی سیکریٹری اطلاعات سینیٹر روبینہ خالد نے پختونخواہ کے صوبائی وزیر اجمل وزیر کے بیان پر ردعمل کا اظہار کرتے ہوئے کہا ہے کہ عمران خان نے جس قرنطینہ سنٹر کا دورہ کیا تھا اس کا پول کھل چکا ہے۔ کے پی کے ڈاکٹرز نالائق وزیراعظم اور نالائق وزیراعلیٰ کے پی کے رویے سے مایوس ہو چکے ہیں۔ یہ قوم سے مذاق نہیں تو اور کیا ہے کہ

گمشدہ وزیراعظم وفاقی وزیر صحت ہیں اور کے پی کے وزیر صحت بھی مفرور ہیں۔ انہوں نے کہا کہ ایک طرف کورونا کی وبا قوم کے لئے مشکلات کا سبب بنی ہوئی ہے دوسری طرف نیازیہ سرکار کرپشن کے ریکارڈ قائم کر رہی ہے۔ سینیٹر روبینہ خالد نے کہا کہ چیئرمین بلاول بھٹو زرداری چاروں صوبوں کے ڈاکٹروں اور طبی ماہرین سے رابطے میں ہیںا ور ان سے کورونا وبا سے قوم کو بچانے کے لئے مشورے کر رہے ہیں جبکہ عمران خان منظورِ نظر بیوروکریٹس کے کہنے پر فیصلے کر رہے ہیں۔ اس کے علاوہ پیپلزپارٹی کے رہنما بہرامند خان تنگی نے بھی اجمل وزیر کو مشورہ دیا ہے کہ اپنی آنکھوں کا علاج کروائیں۔ چیئرمین بلاول بھٹو زرداری اور وزیراعلیٰ سندھ اس وقت کورونا کے خلاف فرنٹ لائن پر متحرک ہیں۔ بلاول بھٹو زرداری واحد لیڈر ہیں جو صرف سندھ نہیں بلکہ پورے ملک کی نمائندگی کر رہے ہیں۔ یہی وجہ ہے کہ وزیراعلی سندھ نے تمام صوبوں کے ڈاکٹروں کو کورونا سے بچنے کے لئے کٹس فراہم کئے ہیں جبکہ نالائق وزیراعظم اور ان کے دو نالائق وزرائے اعلیٰ نے ڈاکٹروں کو کورونا کے رحم و کرم پر چھوڑ دیا۔