اسلام آباد (این این آئی)وفاقی وزیر خارجہ شاہ محمود قریشی نے کہا ہے کہ بلاول بھٹو زرداری کو پیار سے کہوں گا کہ جو کہنا ہے کھل کر کہیں۔بلاول بھٹو کی میڈیا بریفنگ کے بعد رد عمل کا اظہار کرتے ہوئے شاہ محمود قریشی نے کہاکہ میرا اصولی موقف آج بھی وہی ہے جو میں نے ریمنڈ ڈیوس والے ایشو پر لیا تھا۔
انہوں نے استفسار کیا کہ آخر پیپلز پارٹی کو میری کون سے بات بری لگی ہے؟ ہم سندھ کے ساتھ بے وفائی کبھی نہیں کرسکتے۔شاہ محمود قریشی نے کہا کہ سندھ کی ٹھیکے داری صرف آپ کے پاس نہیں، ہم بھی سندھ سے محبت رکھتے ہیں، سندھ ہمارا حصہ ہے، سندھ کی ثقافت سے ہم پوری طرح واقف ہیں۔انہوںنے کہاکہ اٹھارہویں ترمیم کی اہمیت سے واقف ہیں، بلاوجہ اس بات کو ایشو نہ بنائیں، پیپلز پارٹی سے کہا ہے کہ ان کی مدد کرنے کو تیار ہیں، وزیراعظم کے سندھ نہ آنے کی تشنگی بھی جلد دور ہوجائے گی۔بلاول بھٹو زرداری نے اسلام آباد میں پریس کانفرنس کے دوران شاہ محمود قریشی پر تنقید کی اور ان کے استعفیٰ کا مطالبہ کیا تھا۔
