اسلام آباد( آن لائن ) وزیراعظم عمران خان نے 16 وزارتوں کو ریڈ لیٹر جاری کردیا،وزارتوں کو کابینہ کے 5 فیصلوں پر مقررہ وقت تک عملدرآمد نہ کرنے پر ریڈ لیٹر جاری کیا گیا۔تفصیلات کے مطابق کابینہ کے فیصلوں پر عملدرآمد نہ ہونے پر16 وزارتوں کو ریڈ لیٹر جاری کردیا گیا ہے۔وزیراعظم آفس سے دوسری بار وزارتوں کو ریڈ لیٹر جاری کیا گیا ہے۔وزیراعظم آفس کے مطابق وزارتوں نے کابینہ کے
پانچ فیصلوں پر مقررہ وقت تک عملدرآمد نہیں کیا۔وزیراعظم نے 21 دنوں میں رپورٹ تیار کرنے کی ہدایت کی ہے۔وزیراعظم نے وزارتوں کی کارکردگی رپورٹ طلب کر رکھی ہے۔وزارتوں کو کہا گیا ہے کہ 21 دنوں میں عمل درآمد کرنے کے بعد اپنی رپورٹ وزیراعظم کو بھجوائی جائیں.علاوہ ازیں وزارتوں سے خالی آسامیوں اور بھرتیوں کی تفصیلات طلب کی گئی ہیں۔۔اس سے قبل 05 ستمبر 2019 ئ کو وزیراعظم آفس سے حالیہ تاریخ میں پہلی بار وزارتوں کو ریڈ الرٹ جاری کیا گیا تھا۔اس حوالے سے میڈیا رپورٹس میں بتایا گیا تھا کہ وزیراعظم آفس کے مطابق طلب کیے گئے ریکارڈ کی عدم فراہمی پر 27 وزارتوں کے سیکرٹریز کو ریڈ الرٹ جاری کیا گیا تھا جسے آخری تنبیہ اور ناپسندیدگی کی علامت سمجھا جاتا ہے۔ اس سے قبل مختلف وزارتوں سے خالی آسامیوں اور بھرتیوں کی تفصیلات طلب کی گئی تھیں جو فراہم نہیں کی گئی۔وزیراعظم آفس نے مطلوبہ تفصیلات کی فراہمی کے لیے 9ستمبر کی آخری ڈیڈ لائن دی تھی اور کہا تھا کہ وزارتیں ہر سطح پر خالی آسامیوں سے متعلق رپورٹ جمع کروائیں۔اسی طرح اہلیت رکھنے کے باوجود ترقی حاصل نہ کرنے والے افسران کے علاوہ جن سرکاری ملازمین کے خلاف انضباطی کاروائی تین ماہ سے زیر التوا ہے ان کی تفصیلات بھی مانگی گئی تھیں۔اس کے ساتھ ساتھ وزارتوں کے پاس موجود متروک شدہ گاڑیوں ، مشینری اور دیگر سازوسامان کی تفصیلات طلب کی گئی تھیں۔وزیراعظم آفس کا کہنا تھا کہ ریڈ لیٹر وزارتوں کی کارگردگی رپورٹ پر مثبت اثر ڈالے گی۔
