اسلام آباد (مانیٹرنگ ڈیسک) دنیا کی پانچ سو بااثر ترین مسلم شخصیات کی فہرست جاری کر دی گئی جس میں مفتی تقی عثمانی کا نام سرفہرست ہے ، فہرست میں وزیراعظم عمران خان کو مین آف دی ایئر اور امریکی رکن اسمبلی راشدہ طلیب کو ویمن آف دی ایئر قرار دیا گیا ہے ۔قومی نجی اخبار میں شائع رپورٹ کے مطابق اردن کے رائل اسلامک سٹریٹجک سٹیڈیز سنٹرکی فہرست میں حریت رہنمامیر واعظ عمر فاروق کا نام بھی شامل ہے

۔فہرست میں ایرانی سپریم لیڈر آیت اللہ خانہ ای دوسرے ، ابوظہبی کے محمد بن زایدتیسرے ،سعودی فرمانروا شاہ سلمان چوتھے ، اردن کے شاہ عبداللہ پانچویں، ترک صدر رجب طیب اردوان، چھٹے ، مراکش کے شاہ عبداللہ ساتویں، ایرانی لیڈرآیت اللہ سید علی حسین سیستانی آٹھویں، یمن کے اسلامی سکالر شیخ الحبیب عمر بن حافظ نویں اور عمان کے سلطان قابوس مرحوم دسویں نمبر پر رہے ۔حسن نصر اللہ 21ویں،سعودی ولی عہد شہزادہ محمد بن سلمان 24ویں،مولانا محمود مدنی (انڈیا) 28ویں، مولانا طارق جمیل 36ویں اور ملائشین وزیر اعظم مہاتیر محمد42ویں نمبر پر جگہ حاصل کرنے میں کامیاب رہے ۔ اپنے شعبوں میں نمایاں کارکردگی کے باعث آرمی چیف جنرل قمر جاوید باجوہ، صوفی گلوکارہ عابدہ پروین، سماجی کارکن بلقیس ایدھی، مولانا فضل الرحمٰن اور میاں محمد نواز شریف ، ملالہ یوسفزئی و دیگر کے نام بھی شامل ہیں۔