اسلام آباد (مانیٹرنگ ڈیسک) وفاقی وزیر سائنس اینڈ ٹیکنالوجی فواد چوہدری کی جانب ایک ٹوئٹ میں کہا گیا تھا کہ رجعت پسند مذہبی طبقے کی جہالت کی وجہ سے کرونا کی وباء پاکستان میں پھیلی اب ہمیں کہتے ہیں اللہ کا عذاب ہے توبہ کریں، اللہ کا عذاب جہالت ہے جو ان لوگوں کی صورت میں ہم پر مسلط ہے، علماء جو علم اور عقل رکھتے ہیں اللہ کی نعمت ہیں ان کی قدر کریں لیکن جہلاء کو عالم کا درجہ دینا تباہی ہے۔نجی ٹی وی چینل پر مذہبی جماعتوں کو کرونا وائرس پھیلنے کا ذمہ دار قرار دینے پر مفتی منیب الرحمان
نے اپنے ردعمل میں کہا کہ فواد چوہدری کو اس قابل نہیں سمجھتا کہ منہ لگایا جائے۔ انہوں نے فواد چوہدری کو تنقید کا نشانہ بناتے ہوئے کہا کہ وفاقی وزیرکی اپنی سیاسی محرومیاں ہیں۔ مفتی منیب الرحمان نے کہا کہ پوری دنیا جسمانی وائرس سے پریشان ہے اور فواد چوہدری ایک اخلاقی وائرس ہیں۔ مفتی منیب الرحمان نے کہا کہ قوم جانتی ہے کہ آفات علماء کی وجہ سے نازل ہوتی ہیں یا فواد چوہدری جیسے افراد کی وجہ سے۔اس بات کا فیصلہ میں قوم پر چھوڑتا ہوں۔
