کراچی (این این آئی) سندھ حکومت نے صوبے بھر کے تعلیمی ادارے 13 مارچ تک بند رکھنے کا فیصلہ کرلیا۔ذرائع کے مطابق وزیراعلی سندھ سید مراد علی شاہ کی زیر صدارت اتوار کو اجلاس ہوا جس میں کرونا وائرس کی روک تھام اور اس کے حوالے سے کیے جانے والے انتظامات پر غور کیا گیا۔اجلاس میں اسکولوں کی تعطیلات کو بڑھا کر اسے 13 مارچ تک کرنے کا فیصلہ کیا گیا۔

ذرائع کے مطابق سندھ حکومت نے فیصلہ کیا کہ صوبے بھر کے تمام نجی و سرکاری اسکول 13 مارچ تک بند رہیں گے۔ یاد رہے کہ پاکستان میں کروناوائرس کے دو کیسز رپورٹ ہوئے تھے جس کے بعد سندھ حکومت نے تمام تعلیمی اداروں کر پیر دو مارچ تک بند رکھنے کا اعلان کیا تھا۔ علاوہ ازیں بلوچستان، گلگت بلتستان اور دیگر شہروں میں بھی تعلیمی اداروں کو بند رکھنے کا اعلان کیا گیا تھا۔صوبائی وزیر تعلیم سندھ سعید غنی نے 27 اور 28 فروری کو صوبے میں تمام اسکول بند رکھنے کا اعلان کیا۔ سعید غنی نے کہا کہ کرونا وائرس کی خبر کی وجہ سے والدین بہت پریشان تھے، جس کو مددنظر رکھتے ہوئے تعلیمی اداروں کی تعطیلات کا اعلان کیا گیا۔یاد رہے کہ معاونِ خصوصی برائے صحت ڈاکٹر ظفر مرزا نے ایک روز قبل تصدیق کی تھی کہ پاکستان میں کرونا کے چار کیسز رپورٹ ہوئے، تمام مریضوں کی طبیعت خطرے سے باہر ہے۔کروناوائرس سے نمٹنے کیلئے سندھ حکومت نے وزیراعلی کی سربراہی میں ٹاسک فورس تشکیل دی جو روزانہ کی بنیاد پر شام 7 بجے وزیراعلی ہاس میں اجلاس کرتی ہے۔سید مراد علی شاہ نے سندھ کے سرحدی علاقوں پر اسکریننگ کے عمل کو مزید سخت کرنے کی بھی ہدایت کی اور ایران سے زیارت کرکے واپس آنے والے 1500 لوگوں کی اسکریننگ کی بھی ہدایت جاری کی تھی۔