اسلام آباد (این این آئی) وزیر اعظم کی معاون خصوصی ثانیہ نشتر نے کہا ہے کہ حکومت کا احساس آمدن پروگرام غریبوں کو اپنے پائوں پر کھڑا کرنے کے منصوبہ ہے ، 23 اضلاع کی 375 یونین کونسلز میں 2 لاکھ گھرانوں کو کاروبار کا موقع ملے گا۔ وزیراعظم کی معاون خصوصی ثانیہ نشتر نے کہاکہ حکومت بکریاں، گائے، پولٹری، چنگچی رکشہ باڈی، زراعت اور کریانہ اسٹور کا سامان دے گی۔
ثانیہ نشتر نے کہاکہ 60 فیصد خواتین، 30 فیصد نوجوانوں کے لئے کاروبار کے اثاثہ جات دئیے جائیں گے ،اس پروگرام سے نادار اور مستحق افراد کی زندگی بدل جائے گی۔ ڈاکٹر ثانیہ نشتر نے کہاکہ کاروبار کے لئے فی خاندان 50 سے 60 ہزار کے سامان کی تک حد مقرر کی گئی ہے، احساس آمدن پروگرام سے 15 لاکھ افرادکی زندگی پر اثرات مرتب ہوں گے ۔ انہوںنے کہاکہ حکومت نے احساس آمدن پروگرام کے لئے 15 ارب روپے مختص کردئیے، احساس آمدن پروگرام پنجاب کے تین اضلاع ڈیرہ غازی خان، جھنگ اور لیہ میں شروع ہوگا ۔ انہوںنے کہاکہ سندھ کے 7 اضلاع بدین، ٹھٹھہ، سجاول، کشمور، شکار پور، تھرپارکر اور عمر کوٹ میں پروگرام شروع ہوگا،بلوچستان کے تین اضلاع جھل مگسی، ڑوب اور شیرانی میں بھی آمدن پروگرام شروع ہوگا ۔ انہوںنے کہاکہ خیبر پختونخوا کے 10 اضلاع اپر کوہستان، لوئر کوہستان، پالاس کولائی تورغر، بٹگرام میں امد پروگرام شروع ہوگا ۔ انہوںنے کہاکہ شانگلہ، شمالی و جنوبی وزیرستان، ڈیرہ اسماعیل اور ٹانک میں احساس آمدن پروگرام شروع ہوگا۔انہوںنے کہاکہ 60 ہزار سے شروع کاروبار کامیاب ہونے پر مزید مدد کے طور پر بلاسود قرض بھی ملیں گے ، تخفیف غربت پروگرام کی ٹیمیں پارٹنر کی مدد سے مقامی مال مویشی و سامان خرید کر دیں گی،مال مویشی اور مرغیاں پالنے کی تربیت دینے کی سہولت بھی فراہم کی جائے گی،مول مویشی اور پولٹری کو بیماریوں سے بچانے کا انتظام بھی کیاجائے گا۔
