اسلام آباد (مانیٹرنگ ڈیسک) وزیرخارجہ شاہ محمود قریشی نے کبڈی ورلڈکپ جیتنے پر پاکستانی ٹیم کو مبارکباد دی ہے، انہوں نے کہا کہ فائنل میں بھارت کو شکست قوم کے لئے تحفہ ہے، شاہ محمود قریشی نے کہا کہ کامیابی پر ٹیم منیجمنٹ اور کھلاڑی مبارکباد کے مستحق ہیں، انہوں نے کہا کہ پاکستانی کھلاڑیوں نے بہترین کھیل پیش کیا۔

واضح رہے کہ پاکستان نے پہلی بار کبڈی ورلڈ کپ جیت کر تاریخ رقم کر دی ہے، پاکستان نے روایتی حریف بھارت کو چاروں شانے چت کرتے ہوئے 41 کے مقابلے میں 43 پوائنٹس سے شکست دی۔دونوں ٹیمیں پانچویں مرتبہ ورلڈ کپ میں آمنے سامنے آئیں۔ یہ سنسنی خیز میچ دیکھنے کیلئے شائقین کی بڑی تعداد پنجاب سٹیڈیم میں موجود تھی۔ گورنر پنجاب چودھری سرور نے بھی شائقین کے ساتھ گراؤنڈ میں بیٹھ کر میچ دیکھا۔کبڈی ورلڈ کپ کا فائنل جیتتے ہی پاکستانی کھلاڑیوں نے بھنگڑے ڈالنا شروع کر دیے۔ شائقین نے کھلاڑیوں کو خوشی میں اپنے کندھوں پر اٹھا لیا۔ اس موقع پر پورا سٹیڈیم پاکستان زندہ باد کے نعروں سے گونجتا رہا۔ کھیل ختم ہونے سے ایک منٹ قبل تک پاکستان نے مزید پوائنٹس حاصل کیے جس پر پاکستان کا اسکور 43 اور بھارت کا 39 ہوگیا۔ پاکستان کو پوائنٹس ملنے پر بھارتی پہلوان رونے لگے اور محض ایک منٹ رہ جانے پر بھارتی آفیشلز میدان میں آگئے اور اپنے کھلاڑیوں کو میدان چھوڑنے کا کہہ دیا۔ بھارتی ٹیم نے ایک پوائنٹ پر اعتراض کیا اور کھیل کو گندا کرنے کی روایت برقرار رکھتے ہوئے ورلڈ کپ 2014ء اور ایشیا کپ 2016ء کی تاریخ دہرادی تاہم بھارتی اعتراضات کام نہ آسکے۔ کھیل ختم ہونے تک پاکستان کا اسکور 43 اور بھارت کا اسکور 41 رہا۔