اسلام آباد (این این آئی)پاکستان مسلم لیگ (ن) کے صدر اور قائد حزب اختلاف شہبازشریف نے معیشت کی تباہی پر دکھ اور تشویش کا اظہار کرتے ہوئے کہاہے کہ کرپٹ نالائق حکومت کی آئی ایم ایف سے 800 ارب ٹیکس وصولی ہدف میں کمی کی بھیک معاشی تباہی کا اعلان ہے۔

ایک بیان میں انہوں نے کہاکہ ملکی تاریخ کا سب سے بڑا 9.5 فیصد کا متوقع خسارہ قوم اور ملک کے لئے بربادی کا سامان اور بری خبر ہے۔ انہوں نے کہاکہ کرپٹ اور نالائق ٹولے کا کیا دھرا ہے کہ ملک وقوم اس بدقسمت صورتحال سے دوچار ہے۔ انہوں نے کہاکہ معاشی خسارہ چیخ چیخ کر خبردار کررہا ہے کہ اندرونی وبیرونی قرض اور مہنگائی کا خوفناک طوفان آرہا ہے،بے حسی وسفاکی ہے کہ حکومت نے ترقیاتی بجٹ اور انکم سپورٹ پر کلہاڑا چلادیا۔ انہوں نے کہاکہ معاشی سرگرمیوں کے جمود نے لاکھوں چولہے بند اور عوام کو غربت کے جہنم میں دھکیل دیا ،آٹے اور گندم کا بحران نیچے سے نہیں اوپر سے پیدا کیاگیا، حواری غریبوں کی جیب صاف کرچکے ہیں۔ انہوں نے کہاکہ 11000ارب قرض صرف اٹھارہ ماہ میں لے کرریکارڈ قائم کرنے والے قوم کے مجرم ہیں۔ انہوں نے کہاکہ 70 سال میں جو قرض مجموعی طورپر لیاگیا تھا، نالائق ٹولے نے اس کا 30 فیصد سے بھی زیادہ صرف 18 ماہ میں لے لیا،حکمرانوں کے ظلم کا خراج قوم کو سود سمیت اد اکرنے پڑے گا، قوم کا معاشی مستقبل گروی رکھ دیاگیا،نیازی حکومت کی نااہلی اور کرپشن کی قیمت آنے والی نسلوں کو کئی دہائیوں تک ادا کرنا پڑے گی۔