لاہور (آن لائن) پنجاب حکومت نے جلد کیلئے نقصان دہ جعلی کاسمیٹکس تیار کرنے والوں کے خلاف کارروائی کا فیصلہ کیا ہے اور اس ضمن میںصوبائی کابینہ نے دی پنجاب ڈرگ اینڈ کاسمیٹکس ترمیمی ایکٹ 2019 کی منظوری دے دی ہے۔ وزیراعلیٰ عثمان بزدار نے کہا ہے کہ ماضی میں غیر معیاری و جعلی کاسمیٹکس تیار و فروخت کرنے والے مافیا پر ہاتھ نہیں ڈالا گیا۔سابق حکومتیںسوئی رہیںاورجعلسازی کے
ذریعے عوام لٹتے رہے۔ نئے پاکستان میںغیر معیاری و جعلی کاسمیٹکس تیار و فروخت کرنیوالے مافیا کیلئے کوئی گنجائش نہیں ۔ غیر معیاری کاسمیٹکس تیار و فروخت کرنے والے عوام کی صحت سے بھی کھیل رہے ہیں۔ عوام کے وسیع تیار مفاد میں دی پنجاب ڈرگ اینڈ کاسمیٹکس ترمیمی ایکٹ کو صوبائی کابینہ نے منظور کیا ہے۔ ایکٹ کی منظوری سے عالمی معیار کے مطابق کاسمیٹکس مصنوعات کی تیاری یقینی بنائی جاسکے گی۔ کینسر، الرجی، جلدی ا مراض کا سبب بننے والے اجزاء سے پاک کاسمیٹکس مصنوعات تیار ہوں گی اور مارکیٹ میں اوریجنل برانڈ کی دستیابی یقینی بنائی جائے گی۔ دکانوںپر جعلی اور غیر معیاری کاسمیٹکس مصنوعات کی فروخت کی اجازت نہیں ہوگی۔ وزیراعلیٰ عثمان بزدار نے کہا کہ کاسمیٹکس کے سیل پوائنٹس کی لائسنسنگ کا مقصد اوریجنل چین سپلائی کے ذریعے اصل مصنوعات کی فراہمی کو یقینی بنانا ہے۔ عمدہ مینوفیکچرنگ کو یقینی بنا کر معیاری کاسمیٹکس تیار کی جائیں گی۔ انہوں نے کہا کہ عوام میں سیفٹی آف کاسمیٹکس سے متعلق شعور بیدار کرنا ضروری ہے۔
