لاہور(این این آئی) مسلم لیگ (ن) کے مرکزی رہنما وپنجاب اسمبلی میں قائد حزب اختلاف حمزہ شہباز نے کہا ہے کہ معاشرے سے برداشت کا مادہ ختم ہوچکا ہے جو کہ کسی بھی معاشرے کی تباہی کی علامت ہے، ہماری حکومت سی پیک کی شکل میں پچاس ارب ڈالر کی بیرونی سرمایہ کاری لائی، اندھیروں کو روشنیوں میں بدلہ جبکہ اب معیشت سسکیاں لے رہی اور ڈوب رہی ہے،
لوگ بے روزگار ہورہے ہیں اگر حکومت نے ہوش کے ناخن نہ لئے تو وہ وقت دور نہیں جب قوم ان کا محاسبہ کرے گی۔ حمزہ شہباز نے پنجاب اسمبلی میں ارکان اسمبلی اور پارٹی رہنماؤں سے گفتگو کرتے ہوئے کہاکہ کھلنڈروں سے معیشت بہتر نہیں ہو رہی نہ ہی ان سے مہنگائی کنٹرول ہو رہی ہے،گیس اور بجلی کی قیمتوں میں ایک بار پھر ہوش ربا اضافہ کیا جا رہا ہے۔ نوازشریف کے دور حکومت میں اس طرح مہنگائی نہیں تھی جبکہ اب غریب آدمی صبح شام حکومت کو بدعائیں دیتا ہے، وہ وقت دور نہیں جب عوام بہت جلد اس حکومت سے نجات حاصل کریں گے۔انہوں نے کہا کہ جو توقعات اور سبز باغ دکھائے گئے وہ بجلی ا ور گیس کے بلوں کی صورت میں بم بن کر برس رہے ہیں،ہر چیز کا منطقی انجام ہوتا ہے لیکن ان سے مہنگائی کنٹرول نہیں ہورہی۔انہوں نے کہا کہ پی ٹی آئی سی پیک کی مخالفت کرتی تھی اور آج نواز شریف کے منصوبوں پر تختیاں لگاتی ہے۔انہوں نے کہا کہ معیشت ڈوب رہی ہے، لوگ بے روزگار ہورہے ہیں،حکومت نے ہوش کے ناخن نہ لے،تو وہ وقت دور نہیں جب قوم ان کا محاسبہ کرے گی – انہوں نے کہا کہ عوام پر ٹیکس، گیس بجلی ریٹ میں اضافہ کرکے عوام کی زندگی میں قیامت برپاکر دی ہے، ہماری حکومت نے سی پیک میں پچاس ارب ڈالر سے ملک سے لوڈ شیڈنگ ختم کی اور اندھیروں کو روشنیوں میں بدلا جبکہ موجودہ حکمران ایک بارپھر ملک کو اندھیروں کی طرف دھکیل رہے ہیں۔
