بیونس آئرس (این این آئی) ارجنٹینا میں واقع پاکستانی سفارت خانے میں ایکسپورٹ اینڈ مارکیٹنگ ڈیولپمنٹ فنڈز کی مد میں کرپشن کا انکشا ف ہوا ۔نجی ٹی وی کی رپورٹ کے مطابق شمالی امریکی ملک ارجنٹینا میں قائم پاکستانی سفارت خانے میں اس وقت کرپشن کا انکشاف ہوا ہے جب ملک بھر میں
وزیر اعظم پاکستان عمران خان کی جانب سے کرپشن کے خلاف مہم جاری ہے۔ذرائع کے مطابق کرپشن ایکسپورٹ اینڈمارکیٹنگ ڈیویلپمنٹ فنڈزکی مد میں کی گئی، وزارت کامرس کی تحقیقات کیلئے ایف آئی اے کو تحریری درخواست دے دی گئی ہے۔ذرائع نے انکشاف کیا کہ کمرشل اتاشی مرتضیٰ صدیق پر 3 لاکھ امریکی ڈالر کی مبینہ خورد برد کا الزام ہے، مرتضیٰ صدیق 2016 تا 2018 تک پاکستانی سفارت خانے میں تعینات رہے ہیں۔ذرائع نے واضح کیا کہ چلی میں صنعتی نمائش کے نام پر کروڑوں روپے خورد برد کئے گئے، مرتضیٰ صدیق نے کرپشن چھپانے کیلئے صنعتی نمائش کا ریکارڈ بھی ضائع کردیا۔ذرائع کے مطابق کرپشن کا انکشاف وزارت خارجہ کی انٹرنل آڈٹ رپورٹ میں ہوا ہے، وزارت خارجہ کی جانب سے جاری بیان میں کہا گیا کہ فیڈرل انویسٹی گیشن ایجنسی (ایف آئی اے) نے معاملے کی باضابطہ تحقیقات کا آغاز کردیا ہے۔
