ننکانہ صاحب(این این آئی) وفاقی وزیر داخلہ اعجاز شاہ نے کہا ہے کہ بھارتی آرمی چیف کی دھمکیاں جو گرجتے ہیں و ہ برستے نہیں سے زیادہ کچھ بھی نہیں ہیں،ملکی دفاع مضبوط ہاتھوں میں ہے،پاکستان کی طرف سے دیکھنے والی ہر میلی آنکھ باہر نکال دیں گے،کارکنا ن پاکستان تحریک انصاف کا قیمتی اثاثہ ہیں ان کے مسائل کے حل کے لئے ہر ممکن اقدامات کریں گے، وزیر اعظم عمران خان کی قیادت میں
پاکستان کو پر امن،ترقی یافتہ اور خوشحال ملک بنانے کا سفر جاری رکھیں گے۔ منگل کو ننکانہ صاحب میں مختلف میونسپل اور ٹاؤن کمیٹیوں کے نومنتخب عہدیدران کی تقریب حلف برادری کا انعقاد کیا گیا ۔ منگل کو وفاقی وزیر داخلہ اعجاز احمد شاہ اور پاکستان تحریک انصاف سنٹرل پنجاب کے صدر اعجاز چوہدری تقریب کے مہمان خصوصی تھے- تقریب سے خطاب کرتے ہوئے وفاقی وزیر داخلہ اعجاز احمد شاہ نے کہا کہ ملکی معیشت بہتری کی طرف گامزن ہے۔ انہوںنے کہاکہ بھارتی آرمی چیف کی دھمکیاں جو گرجتے ہیں و ہ برستے نہیں سے زیادہ کچھ بھی نہیں ہیں۔ انہوںنے کہاکہ ملکی دفاع مضبوط ہاتھوں میں ہے،پاکستان کی طرف سے دیکھنے والی ہر میلی آنکھ باہر نکال دیں گے۔ انہوںنے کہا کہ کارکنا ن پاکستان تحریک انصاف کا قیمتی اثاثہ ہیں ان کے مسائل کے حل کے لئے ہر ممکن اقدامات کریں گے۔ انہوں نے کہا کہ موثر حکومتی پالیسیوں کی بدولت ملکی حالات تیزی سے بہتری کی طرف گامزن ہیں۔انہوںنے کہاکہ مفاد پرست عناصر کی طرف سے ملک میں آٹے کا مصنوعی بحران پیدا کرنے کی کوشش کی گئی جو بروقت حکومتی اقدامات کی وجہ سے ناکام ہو گئی ہے ۔انہوں نے کہا کہ سابقہ حکومتوں نے ڈالر کی قیمت کو مصنوعی سہارا دیا ہوا تھا، وزیر اعظم عمران خان کی قیادت میں پاکستان کو پر امن،ترقی یافتہ اور خوشحال ملک بنانے کا سفر جاری رکھیں گے
